Inter Miami-in Argentina forward lawmlut

Inter Miami-in Argentina forward lawmlut
Pathianni zan a ni a, Miami khawpui chuan an fapa rangkachak Lionel Messi an buaipui nasa mai a, Inter Miami khelmual DRV PNK Stadium-a mipui khat vek hmaah Argentina forward lawmluhna leh phochhuahna hun an hmang.
Official-a Messi lawmluhna hunah hian managing owner Jorge Mas, Jose Mas leh co-owner David Beckham-te’n khelmual chhunga dawhsan an dawhah Argentine hi a jersey hak tur kawr hma lama number 10 inziak nen lo dawngsawngin, a nupui leh a fapate pathum – Thiago, Mateo leh Ciro-te bakah Manchester United legend Beckham-a fanu Harper leh a fapa Cruz-te pawh an inlan.
Barcelona tana goal khung hnem ber Messi hian Nou Camp-a a khawsak chhung khan goal 672 thun tlingin, La Liga title 10, Champions League pali leh Spanish Cup pasarih a lakpui hman.
Tarlan tak angin, an superstar lei thar Messi lawmluhna chhim tur hian DRV PNK Stadium-a thutna awm thei zawng zawng hralh zawh vek niin, mipui 20,000 zetin khaw chhe hnuaiah Ballon d’Or chawimawina tum sarih dawng tawh hi an lo hmuak.
Kum 36 mi hian Spanish tawngin thu tawite a sawi a, supporter-te hnenah lawm-thu sawiin, a la zuai lo a, tunhma ang bawk khan trophy chakin a la tuihal reng tih a sawi.
Nikum world cup-a Argentina cham-pion-puitu Argentina forward hian kum 2025 thleng cham turin Major League Soccer (MLS) club hia zawm a, Inter Miami-ah hian Barca tana a khelhpui thin defensive midfielder Sergio Busquets nen khan an kheldun leh dawn a, Spaniard pawh hian Miami tana kum 2025 thleng cham turin contract a ziak ve tawh bawk.
Busquets pawh hi Pathianni zan vek khan dan anga lawmluh a ni ve nghal a ni.
Catwalk zawha Messi lo lan rual hian stadium-a thupuangtu chuan ‘America number 10, khawvela number 10 tha ber’ tiin a lo puang dum dum a; an star thar hi seven-time Super Bowl winner Tom Brady leh four-time NBA champion Stephen Curry-te chuan video message kaltlangin US-ah an lo lawm tih an puang ve bawk.
Messi chuan thu sawiin, “Ka lo kal chhan tipuitling tura training zawm ka duh tawh takzet a, intihsiak hmachhawn ka duhna kha a la pangngai reng a, hnehna chan ka duh a, he club hi thangliam zel tura puih ka duh a ni.
“He khawpuia inkhel tur leh club-in project a neihte tihlawhtling tura ka nupui fanaute nena kan lo kal thei hi ka hlim em em a, nuam kan ti hle dawn tih hi rinhlelh rual a ni lo. Hun tha leh thil tha kan tawngbaw ngei dawn a ni,” a ti.
Lionel Messi kuta number 10 shirt hlan a nih rualin stadium chhunga halmawi an kam chu an chhuah a, mipuiin thawm ring tak an chhuah bawk.
Fort Lauderdale venga DRV PNK Stadium hi Inter Miami stadium lailawk niin, seat pangngai 18,000 chauh a awm a, MLS bikah chuan California lama awm San Jose Earthquakes khelmual PayPal Park nen stadium te ber an ni dun mek.
Hei hi an stadium dinhmun a nih avangin mipui sing hnih leng thei turin stadium chhungah thutna an dawhbelh hial a ni.
Kum hnih chhunga game 75 khela goal 32 a thunsak hnuah 2022-23 season tawp rual khan Messi hian French champion Paris St-Germain chhuahsanin US pan a thlang a, MLS lo pawh sawmtu mawm tak tak a nei chungin Arab lam beiseina tithlawnin a career-a a vawikhatna atan non-European club a zawm ve ta a ni.
Club neitute zinga pakhat Beckham chuan Messi an senglut thei chu mumang a taka lo chang ta a nih thu sawi ve bawkin, “Leo, i career-a bung dang rahna atana kan club i thlang hi kan va inchhuang em,” a ti.
Inter Miami neitu hlun ber American billionaire Jorge Mas pawhin Messi chu boot bun tawh zinga player tha ber tiin a fak.
Messi hian Leagues Cup bul an tanna match July ni 21-a khelh turah Miami tana a game hmasaber ni turin LIGA MX club Cruz Azul a hmachhawn rin a ni.
Kumin June thla mai khan Miami hian an coach chhawr lai Phil Neville banin kum 60 mi Gerardo Martino an senglut a, Messi hian Barca leh Argentina team lama a pu hlui bawk kha a thawhpui leh dawn a ni.
Media-te tarlan danin kumin June thla vek khan Saudi Arabian club Al-Hilal chuan kum thum chhunga US dollar vaibelchhe 1.5 hlawh turin Messi an sawm tih an tarlang a, chuti khawpa tam hlawh thei tur a nih laiin Argentine hian Inter Miami zawm a thlang a, MLS a pan chhanah hian a nupui chu thuk taka a inrawlh thu media lamin tarlang telin, Arab rama khawsak ai chuan US leilunga khawsak rel chu Pi Antonela Roccuzzo chuan a thlang zawk niin an sawi!
Tarlan tawh thin angin, season liamta tawp hma lawk khan club thuneitute hriatpuina leh phalna la hmasa loin Messi chhungkua hi Saudi Arabia ramah an zin a, training session pawh a thulh nual hman a, kha thil avang khan PSG pawhin an han ‘suspend’ hman ren rawn a, Cristiano Ronaldo hnung zuia thlaler lalrama a kal ve mai rinna a lian hman.
Portugal captain Ronaldo pawhin nikum December thla daih tawh khan sum tam tak hlawh turin Saudi Arabia club Al Nassr-ah kum hnih leh a chanve daih tur inremna a lo ziak tawh bawk a ni.