Internet hmanga bum tawk an tam

Internet – online hmanga bum leh tihhmingchhiat tawk Mizoramah an pung tial tial a, a tam ber chu sum kaihhnawiha inbumna a ni a, sex kaihhnawiha inbumna leh intihhmingchhiatna lam thubuai a tam bawk.Khawvel hmasawnnaa in a kentel, internet – online hmanga inbumna hi a hluar chak hle a, a bikin cyber crime zingah sum kaihhnawiha inbumna a hluar ber a, complaint dawn zawng zawnga zaa 75 chu hetianga inbumna hi a ni tih Cyber Crime Police Station (CCPS) chuan an sawi.
Internet leh online-a inbumna thleng tam takah pawisa chantu (victim) ten an pawisa hmuh let leh theihna’n CCPS hian a lo pui thin a. Cyber Crime PS din a nih, May 2020 atanga chhutin inbumna pawisa ngawr ngawr pawh hi Rs. 24,31,455 hmuh let leh niin, a neitu dik takte hnenah pek let leh a ni tih an sawi. Hemi piahlamah hian an bungraw chah, a man pek lawk tawh, bungraw thleng thei lo ang chi ah a belhkhawmin cheng nuai 16 hu bungrua hmuhlet sak a ni tawh bawk.
National Cybercrime Reporting Portal (NCPR) hmanga mipuiin Mizoram Police hnena complaint an thehluh bawhzuinaah inbumna pawisa Rs. 11, 05,018 chu bank hrang hrangah khawih chet theih loh (hold) a dah a ni a. Heng pawisa, bank-in a hold te hi a bank leh court lama thuneitute nen tanghoa a neitu dik takten an hmuh let leh theihna’n theihtawp chhuah a ni tih an sawi.
Social media kaltlanga inbumna a hluar tial tial a, a bikin Facebook leh Telegram chu hetiang ‘bumtu’ hian tunhnaiah an hmang tangkai zual tih sawiin, pawisa dah pun theihna ang chi te, thiam taka tawktarhin, a hnu ah cheng sing leh cheng nuai chuangte in an chhuhsak ta thin a ni. Bumtute hi Mizoram atanga che an ni loa, India ram hmun dang leh foreign atangtea rawn ti thin an ni tih sawi a ni. ‘Link’ nazawng lut lo turin CCPS hotute chuan mipui an chah a ni.
Bank account atanga sum inlaksak inbumna bakah hian, sex kaihhnawiha inbumna a hluar a, bumtute hian hmeichhia mawina tawktarha hmanga bia in, an beisei ang an tih sak hnu ah, thlalak hmangte in an duh tihsak turin an vaulet (blackmail) leh thin tih an sawi. Tuartu (victim) zingah kohhran hruaitute thleng pawha an tel thin avangin hemi kawngah hian mipui fimkhur hle se an duh tih an sawi bawk.
Cybercrime Police hotute chuan khawl leh tunlai thiamna thil dang an nei tha tawh a, hetiang lama pawikhawih chak vanga che thinte an umzui zel theih tawh avangin, pawikhawih tum lama che lo turin mipui an duh tih an sawi a ni.