Naihzawng emaw kawppui emaw te nena inthen chu a nain a hrehawm vel a, zan hnih khat thil thua ngaiawh leh maina chi a ni lo a, intheihnghilh a, hmalam pana kal leh turin hun eng emaw chen kan mamawh thin. Mahse, hetiang inthenna boruak hi a mipa nge hmeichhiain zawkin tuar thiam a, hmalam pan leh hmasa thei zawk tih chungchang hi relationship lama mithiam ten zirchianna an nei ta a, chuta an hmuh dan chuan mipa aiin hmeichhia ten inthen chu a la na zawk a, an rilru leh taksa pawhin a tuar nasa zawk a, mahse, hmalam pan tura ke pen leh an awlsam zawk niin an sawi.
Evolutionary Behavioral Sciences journal-a he zirchianna chungchang an tarlanah chuan Bingham University leh University College London a mithiam te chuan ram hrang hrang 96 atangin mi 5,705 an interview a, an ngaihzawng/ kawppui te nena an inthen avanga rilru leh taksa lama an tawrh dan tihlan theihna questionaire an chhan tir a. Chuta a lan dan chuan mipa aiin hmeichhia ten inthen chu an la na zawk tih a ni a, mahse, an nat dan hi a inthlau lutuk chuang lo. Inthen nat dan hi number 1 atanga 10 thlenga entirin, hmeichhia a nawlpui thuin inthen an lak nat dan chu 6.84 vel a ni a, mipaah chuan 6.58 vel a ni a, hei hi rilru lama an tawrh dan a ni. Taksa lama an tawrh danah hmeichhia te chu 4.21 a ni a, mipa-ah chuan 3.75 a ni ve thung.
Hmeichhia te hian inthen chu tuar na zawk mah se a intuam dam leh kawngah mipain aiin hma lam pan leh an awlsam ve leh zawk a ni. Zirchianna neitute chuan inthenna avanga an natna chuan hmeichhia te chu mahni inngaihtuah harh a, thil hriatthiam leh an awlsam zawk a, chutih laiin mipa te chuan a tirah la na em em angin lang lo mah se a rei telh telh a, an pawi tihna te a lian leh tual tual zawk thei niin an sawi bawk.
Mithiamte chuan mipa thenkat phei chuan PRG (Post relationship grief) te pawh an nei nasa niin an sawi a, inthen hnu, kum a vei tawh hnu pawhah an inthen boruakin a la chiah te pawh an awm. Mipa ten an then tak hmeichhia te an tana an hlutna chu an hrechhiang telh telh a, chuvangin inthen hnua ngaiawh leh hi an harsat zawk niin an sawi a ni.
Inthen- tunge tuar thiam zawk?
![](https://theaizawlpost.org/wp-content/uploads/Clipboard01-1341.jpg)