Inthlan bawrah Myanmar sipaiten mi 170 vel that – UN

Inthlan bawrah Myanmar sipaiten mi 170 vel that – UN
Myanmar-a ram inthlanpui neih chhungin UN chuan sipaiten thlawhna hmanga mi an kahnaah mi 170 vel an thi niin a sawi.
UN hnuaia mihring dikna chanvo humhalhtu pisa chuan ‘thu rinawm tak an dawn’ atangin civil mi thi zat hi an sawi a. December, 2025 atanga kar liam ta thleng, inthlanpuia vote thlak thawh thumna leh a hnuhnung ber lai vel khan thlawhna hmangin sipaiten vawi 408 an kap niin an sawi bawk.
Inthlanpui pawh hi ram tam tak leh mihring dikna chanvo humhalhtu pawlte chuan tih ve mai mai niin an ngai hlawm.
Myanmar-a sipaiten an thlawp, Union & Solidarity Party (USDP) chuan hnehna an chang niin sorkar chanchinbuin a tar lang a. Result hi rinlawk sa ang a ni a, thununna khauh tak hnuaia inthlang, a tling tur chiang saa ngaih a ni.
An ram hmun tam takah vote hi thlak a ni lo va, sipaiten kum 2021-a mipui thlan hruaitu, Aung San Suu Kyi-i paih thlaa lung inah an dah hnuah tual chhung indona nasa tak chhuakin vote thlak theih a ni lo.
Suu Kyi-i party, National League for Democracy (NLD) hi sipaiten thuneihna an chan leh hmaa vawi hnih inthlanah chiang taka thlan tlin an ni a, tun tumah erawh an chuh ve phalsak an ni lo.
Mi thenkhat chuan sipaite hian an thawhpui party-te hmangin thuneihna an chan theih nan thil an ti niin an ngai.
UN rights chief Volker Turk-a chuan Zirtawpnia thu a chhuahah inthlan hi ‘sipaite thil kalpui vek’ niin a sawi.
‘Eptu leh hnam bil pawl eng emaw zatte chu inthlana chuh ve an phal lo’ tih a sawi bawk.
Turk-a hian mipuite chu ‘vote an thlak emaw, thlak loh emaw hlau chungin khawvelin politic-a dikna chanvo a pek an hmang thei lova’ tih an ni tih a sawi.
Inthlan lai pawh hian ‘ram chhung hmun zau tak chu buaina leh indona boruakin a tuam reng’ niin a sawi bawk.
UN Human Rights’ Myanmar team hotu, James Rodehave-a chuan inthlan lai bawra civil mi thite hi December thla tira campaign tan atanga January thla tawpa vote thlak tawp thlenga mi niin a sawi.
A zat pawh hi chiang taka hriat a nih rualin a dik lo thei niin a sawi a, ‘inbiakpawhna chhia avang leh mi thenkhatin a hmunhma leh thil thleng an sawi ngam loh avangin’ a dik tak hriat a harsa niin a sawi.