MLA inthlan hmaa an partyt official candidate-te thutiam laa an sawi dan letling chiahin ZPM sawrkarin an duhsak zawngte contract pekna atan restricted tender an tharthawh leh tih Congress hruaitu James Thanghmingmawia chuan a sawi.
Thawhtannia Congress Bhavan-a inkhawmah MPCC Social Justice chairman James Thanghmingmawia chuan, 2023 October 24 khan ZPM MLA candidate-te chu a huhoa thutiam laktir niin, an tiam rual chu, “Chhung leh khat, mahni mi leh sa leh midang tute pawh duhsak bikna lakah ka inthiar fihlim ang,” tih a nih thu a sawi.
“Chhung leh khat, mahni mi leh sa leh midang tu pawh duhsak bikna laka inthiar fihlim tur anga mipui laka thutiam sawirualtute khan, duhsak bikte hnena contract hna an pek theihnan sawrkar lo awm tawhten an la tih ngai loh angin, 2024 June 6-a Council of Minister thukhawm chuan contract tender chhanna chu 5% below leh 10% chunglama chhan khapna a pawm a, he thurel bawhzuina hi Finance commissioner & secretary chua a tichhuak zui a ni,” a ti.
Hetianga duhsak bikten contract hna duhtawka inpekna tur hian tu sawrkarah mah Council of Minister-in a la rel ngai lo tih MPCC hruaitu hian a sawi a. Hetiang khapna hi MNF sawrkar hmasa khan 2007 August 24-ah PWD secretary hmingin an lo siam tawh a, he order hi Congress sawrkar khan tha lo tiin kum 2013 khan an sut tih sawiin, “ZPM sawrkar chuan he kalphung tha lo tak, fair competition nuaibo a, duhsak zawngte contract hna duhtawka inpek theihna hi rawn thar thawh lehin, an mi leh sa leh an chhungte vulh an tum ta a ni,” a ti.
He hi ram tan a tha lo tituten High Court-ah an khing a, kumin May 20 khan he khapna hi tihtawp laikawk a ni a, hei vang hian kumin May 26 khan a hmaa order tihtawp lailawkna tur order chu sawrkarin a siam ve ta chuk chuk tih a sawi a ni.
MPCC Social Justice Cell chairman chuan, 2024 April 17 khan ZPM sawrkarin hna hrang hrang 76, cheng vaibelchhe 629.17 man chu a hlawmin restricted tender blanket approval-in an pe a. 2025 October 22 khan hna hrang hrang 41, vbch. 328 man chu hetiang tho hian an pe leh vek tih a sawi bawk.
Tourism department-in Swadesh Darshan hnuaia an project hmuh, Heritage and Cultural Centre Champhai, cheng nuai 3885.45 leh Eco- Resort Experience at Keilungliah Champhai, nuai 3387.25 man pawh restricted tender hmangin duhsak zawng an pe niin a sawi a. Keilungliah chu Congress sawrkar hmalaknaa khuah, PHE department atanga hmalak niin, October 2018 ah tuikhuahna tur lung phumin cheng nuai 1988 dah a ni a, an sawrkar khan a khawih chhunzawm hman ta lo tih a sawi.
“Keilungliah Eco-Resort hna khi joint venture, P&V Eastern Engineers and its Associates pek an ni a, he company hi ZPM MLA Pu Ginzalala ta nia sawi a ni. Tuna Keilungliah tuikhuaha dah tur house boat chuan sawi a hlawh hle a, nuai 50 tur nia sawi niin a man nen a inphu lo hle in an ngai,” a ti.
Inthlan hmaa an sawi letlingin duhsak zawng contract an pe
