Assemble inthlan hmabak mek, Assam-ah thil chhia khawn khawm thin mipa kum 45 mi leh naupang kum riat mi chu Inrinnia a Jorhat district-a eng thil nge hriat chiah loh puakah an thi a, mi dang pahnihin hliam an tuar bawk niin police-ten an sawi.
Jorhat khawpui chhunga Raja Maidam-ah chawhnu lama a thleng a ni a. Tual chhung mite chuan a puak ri hi a ring hle tih an sawi.
“A tirah chuan LPG cylinder puak angin kan ngai a; mahse, a hnuah chuan thil danglam tak a ni tih kan hrechhuak ta a ni,” tiin tual chhung mi pakhat chuan a sawi a, an hmunah hian an tlan nghal a, mi pali hliam an hmu tih a sawi bawk.
Police-te chuan hliam tuarte hi Jorhat Medical College & Hospital-ah hruai nghal an ni a, doctor-ten an zinga pahnih chu thi tih an puang zui tih an sawi.
Thite hi Jorhat khawpui chhunga Rajamaidam New Colony-a cheng an ni a. Hliam tuarte hi hmeichhe naupang kum 12 mi leh hmeichhia kum 35 mi an ni.
Jorhat-a Senior Superintendent of Police (SSP) Sibhrajyoti Bora-a chuan puitling thi zawk hian khawpui chhung hmun hrang hrangah bungraw chhiate a la khawm thin niin a sawi.
“Tual chhung mite chuan Noor Mohammad-a hian a puah lai hian a bungraw lak khawmte hi tubohvin a chhu mek niin an sawi a, a bula naupang inkhelte chu puak hian an fuh tel a, puak hi kan enfiah mek a ni,” a ti.
Noor Mohammad-a thil khawlte chu he thil thlen chhan a ni thei em tih hriat tumin en fiah mek thu a sawi . “Hemi chungchang hi kan chhui zui zel a, ruangte hi post-mortem turin thawn a ni tawh bawk,” a ti.
He thil thleng hian mi chengte zingah himna chungchanga hlauhthawnna a thlen phah a. Police-te chuan LPG cylinder puak a nih loh thu an sawi chiang tawh a; mahse, a puak hi nat em avangin mipui hi an chiai hle a ni.
Assam hi thla thara assembly inthlang tur boruak tang takin a tuam lai a ni mek bawk a. Political party hrang hrangte chu na tak taka inbeiin campaign beihpui an thlak ngawrh lai a ni a, hetiang thil thleng hian mipuiah ngaihthat lohna a siam awlsam phah lai tak a ni bawk.
Inthlan hmabak Assam-a thil puakah mi pahnih thi
