Mizoramah boruak muanawm tak hnuaia MLA inthlanpui hlawhtling taka neih a nih avangin a lawmawm hle tiin, Pathian leh mipui chungah lawmthu a sawi tih MNF president, chief minister Zoramthanga chuan a sawi.
MNF president hian thuchah siamin, Pathian zarah boruak muanawm tak hnuaiah tluang tak leh hlawhtling taka MLA inthlanpui 2023 neih a ni chu lawmawm a tih thu a sawi a. Pathian hruaina zawng zawng avangin Mizo National Front party chuan lawmthu a sawi tih a sawi.
“India rama state ralmuang ber Mizoramah democracy rama inthlanna awm tawhah chuan muanawm leh felfai ber, ram dangte entawntlaka inthlan buatsaih a ni leh thei hi dan zawm kawnga state mipui tanrualna leh inpumkhatna that vang a ni. Election Commission of India thuchhuakah pawh mipuiin phur leh hlim takin ‘Democracy Kutpui’ Mizoramin a hman thu tarlan a ni hi thil lawmawm tak a ni a, Mizo mipuiin vawnghim zui zel ang u,” a ti.
Inthlan buatsaihtu leh buaipuitu, venhimna lam buaipuitute chungah Zoramthanga hian lawmthu a sawi a. Mizoram People’s Forum leh political party-te thawhhona thuthlung anga inthlanna zalen, thianghlim, dik leh fel a awm theihna tur leh, sawrkar inrelbawlna tha a awm theihna’na hmalakna pawh a hlawhtlinna hmuh a ni zel nia sawiin, chumi tura hma latu MPF chungah a lawm tih a sawi.
“Mizorama roreltu thlang tura mahni dikna leh chanvo hlen ngei duh, khua leh tui tha mawhphurhna hlentu ram mipui vote thlak tura pen chhuak zawng zawng chungah leh, a bikin kum upa zawk, mahni in lamah leh vote thlakna hmuna vote thlak tura pen chhuakte chungah lawmthu ka sawi a ni,” a ti.
Thuthar thehdarhna kawng hrang hranga thawktuten inthlanpui neih zawh taka an thawh hlawk zia a lang nasa hle tih MNF president hian sawiin, an inpekna leh thawhrimna avangin an chungah lawmthu a sawi a. Hei bakah hian MNF party tana thawktu zawng zawng chungah leh ram rorelna tha leh ram hmasawnna thlen tura MNF ruahmanna leh ram leh hnam humhim kawnga ke an penna thlawptu Zoram mipui leh thalaite chungah a lawm thu a sawi bawk.
Mizoramah inthlanna zalen, thianghlim, dik leh felfai a awm theih nan leh ram rorelna tha a awm theih nan MNF chuan theihtawp chhuah zel an tum tih a sawi a. Mizoramah hmasawnna nasa zawk thlentir tur leh ram leh hnam, sakhua humhim turin theihtawp chhuah zel a tum bawk, tiin, chu’ng an thil tum tihlawhtling tura tha leh zung thawhtu zawng zawng chungah a lawm tih a sawi a; ram mipui thlawpna a ngen nghal tih a sawi a ni.
Inthlan muanawm kan neih vangin a lawmawm – Zoramthanga
