Election Commission of India-a chief commissioner Rajiv Kumar Mizoramin MLA inthlanpui a neih tur chu muanawm taka nei turin a chah a. Inthlan dawn laia dan zamte bawhchhiat a nihin awlsam taka an complaint theih na – cVIGIL mobile app chu hmang tangkai turin mipui a chah.
Mizorama MLA inthlanpui neih tur inbuatsaihna kalpui dan endika rawn kal ECI hotute chuan inthlan muanawm leh felfai tak buatsaih a, thuthang diklo leh inbumna laka fihlim tum theuh theuh turin mipui an chah a. Mipuiin inthlan hun chhunga dan bawhchhiate awlsam taka an complaint zung zung theih nan ‘cVIGIL mobile app’ chu hmang tangkai tura ngenin, “He application hmang hian inthlan dan kalha che te thlak leh video awlsam taka thehluh mai theih a ni a, he application atang hian complaint a nihna hmun awlsam taka a hriat theih bakah minute 100 chhunga bawhzui nghal zel tur a ni,” CEC Rajiv Kumar hian a ti.
Voter helpline app hmangin mipuiin electoral roll-a an hmung awm dan, vote an thlakna hmun tur, inthlan result an en theih, EVM hman dan bakah awlsam taka EPIC an download theih thu te a sawi a. Saksham app hmangin candidate-ten awlsam takin punkhawm phalna an dil theih bakah rualbanlote leh EPIC a thil dik lo awm siamthat leh rualbanlote tan wheelchair an dil theih thu a sawi.
Know Your Candidate (KYC) app hmangin inthlana party candidate-te nihna kimchang a en vek theih thu sawiin, mipuiin mi dik leh tha an thlan chhuah theih nan candidate zinga criminal case neite chu campaign hun chhungin chanchinbu leh tv channel hrang hrang pathumah tal chhuah tur a nih thu a sawi a. Criminal case nei tawh candidate-te chu party-ten candidate atana an dah chhan kimchang tak chanchinbua an chhuah a ngai tih a sawi bawk.
Inthlan zalen, thianghlim leh langtlang a awm theih nan inkalpawhna ramri, a bikin thenawm state nena inrina, interstate check post kaltlanga dan phal loh sumfai, zu, damdawi leh vote zawn nana a thlawna thil sem tur ang chite ngawrh lehzuala ven a nih tur thu chief election commissioner hian a sawi a. Thenawm state-te nena inthurualin dan phal loh thil man hmak hmak tur leh dan bawhchhetuten thuneitute an hlauh theih nan leh, ECI duhdan anga thlemtu awm lo inthlanna muanawm siam tura theihtawp chhuaha hma a lak thu a sawi a ni.
Zawhna chhangin, Tripura-a awm Bru-te an awmna hmun ngheta sawn chhuah an nih tawh avangin Mizoram electoral roll atanga paih an ni a. Chutihrualin roll endik fel a nih hnu ah pawh paih hmaih palh awm thei a ni tih ECI hotute chuan an sawi a. Mizoram People Forum-in inthlan thianghlim leh fel neihna tura hma an lak dan chu, vote thlak tur an lo dangte a nih ngawt loh, inthlan thianghlim neihna tur lam a nih avangin, sawi theih an nei lo tih an sawi.
ECI hotute sawi thenkhat:
# Mizoramah vote nei mi 838000 an awm mek a; mipa vote nei 406000 leh hmeichhia vote nei 432000 an ni.
# Pianphunga rualbanlo vote nei 3058, kum 80 chunglam vote nei 9190, kum 100 chunglam vote nei 615 leh thalai vote nei thar 40934 an awm.
# Polling station 1276 awmin, rualbanlote tan polling station hmun 11-a siam a ni. Polling station 22 chu lirthei kal theih lohna hmun a ni a, fur laia lawng chauha kal theihna hmun 19 leh thal lai pawha lawnga kal ngaihna hmun 6-ah a awm.
# Vote thlakna hmunah hian electric eng, tui in tur, ek in, tanpuina dawhkan, ramp leh rualbanlote tanpuitu tur volunteer an awm theuh tur a ni.