1-Mizoram (ST) Parliamentary constituency atana general observer-a ruat Dr Nipun Vinayak kaihhruaiin district hrang hrangah polling official-te duty-na tur khawl hmanga thliarna ‘randomisation of polling official’ chu Thawhlehni khan inbiak hmuh theihna kaltlanga neih a ni a. District tina assistant returning officer (ARO) ten polling official an neih tur zat report an pe.
Election Commission of India-in inkaihruaina a duan angin, polling party hian an kal duhna polling station an thlang thei loa, an kalna tur hmun hi khawl hmanga thliarfel thin a ni. Randomization thawhkhatna hi neih tawh niin, hetah hian inthlan laia duty-a chhuak turte thlan an ni tawh a. Chu’ng ho tan chuan training pawh pek tawh a ni. Tun tumah hian 1st randomization-a thlanchhuah tawhte hi team hrang hrangah thliar an ni leh a. Inthlan duty tura an chhuah hma chuan an kalna tur polling station an la hre thei dawn lo a ni.
General observer hian Mamita randomisation neih a hmanpui a. Nodal officer, sector magistrate leh elections official dangte chu an chanpual/ mawhphurhna theuh uluk taka thawk tur leh thiam tawh leh hre tawha inngai loa, taima taka inzir turin a chah. Hemi zawh hian Bawngva Polling Station chu a hmunah a tlawh a ni.
Siaha district-ah chuan Siaha leh Palak Assembly bial (segment) tana ARO VL Hruaizela Khiangte hoin an telpui a. Khawzawlah pawh Tuichang Assembly segment ARO K Lalrohlua hoin an telpui.
Tuichang bialah hian polling station 28 awmah polling station 4 chu hmeichhe hlang enkawl (Pink Polling Station) a ni dawn a. Polling station pakhat hi thalai rual enkawl (All Youth Manage Polling Station) a ni ang. Thalai rual enkawl tur P/S 1 leh P/S 23 danga duty tur team chu khawl hmanga siamrem a ni a. Pink P/S-a duty tur team chu general observer leh returning officer Nazuk Kumar te hmuh laiin asst RO hian lehkha hmangin a pawt chhuak a ni.
Hnahthialah chuan South Tuipui bial ARO Chuauhnuna hoin an telpui a. South Tuipui bialah hian P/S 27 awmin, reserve team nen team 32 din a ni. Randomization-ah hian P/S 24-a kal tur polling team 24 bakah reserve team 5, a vaiin team 29 chu khawl hmanga thliarfel an ni a, hmeichhe hlang vil tur P/S pahnih leh thalai hlang vil tur P/S pakhata team kal tur chu manual-a thliar tur a ni.
April 17-a 3rd randomisation neih turah polling official-te duty-na tur polling station tih fel a ni ang.
Inthlana duty turte team thliarfel
