Inthlang turin MNF kan inpeih at
– Dr R Lalthangliana
Village council leh local council inthlan hmachhawn turin an inpeih at a. Democracy venghim a, khua leh veng tinah mipui duhthlanna ngaipawimawh chunga hmasawnna hna thawk tur candidate an dah vek tih MNF hruaitu Dr R Lalthangliana chuan a sawi.
MNF senior vice president Dr R Lalthangliana chuan, VC/LC inthlan turah vauna leh insawithaihna chi hrang hrang hmangin ZPM minister rualte leh ruling MLA ten vote thlak tura mipui an rum thaihna thawm hriat tur a tam tih a sawi a. ZPM vote lo chu Housing for All dawn tir ve lo tura vauna thawm leh mipui hamthatna tura duan central scheme hmanga inthlemna thawm hriat tur a awm tih a sawi
“Cabinet minister-te meuh pawhin opposition VC thlangtlingte tan chuan minister-te auh eih an harsat hle tur thu hial an auchhuahpui duh ta zel mai hi democracy kalphung kalh tlat a ni a. Mipui sawrkar letling chiah, party bil sawrkar sawhngheh tum a, khaw eng pawh zah loa ZPM sawrkar hmalak mekna hi mipuiin kan vote hmanga kan dodal a ngai,” a ti.
State-a sawrkarna an chan hma in tuna chief minister ni ta Pu Lalduhoma leh ZPM president ni lai Pu Lalliansawta te chuan VC/LC ah ruling party candidate kher thlan tlin an ngai lo tih an lo aupui tawh a. Ruling leh opposition LC/VC ten fund an dawn theih dan leh dawn zat a inan thu an lo sawi tawh thin tih MNF hruaitu hian a sawi. “An sawi dik hle a. Heng thil hre chung hian, VC leh LC inthlanah ZPM sawrkar laka democracy humhim a, huaisen taka vote thlak turin Zoram mipui kan ngen a ni,” a ti.
ZPM sawrkarin LC leh VC dinglai an thawhpui duh loh vang leh party bil sawrkar sawhngheh a tumna vang liau liaua term dinglai thla 6 chuanga a pawt tawi chuan nakin zel atan precedence tha lo a nei tur chu a pawi hle tih minister hlui Dr R Lalthangliana hian a sawi a. Kum 2020-a VC leh LC inthlan hun pangngaiah Covid vangin inthlan hun sawn tlai a tul a. Khatih lai khan Congress VC leh LC an la tam ber a, MNF chu a tlem zawk an ni, tiin, MNF sawrkar khan tha takin a thawhpui tluan vek tih a sawi.
Sawrkar kal khat leh lutuk, thil tih tlang hrawk thin ang chu mipui mimirin kan tuar tih a sawi bawk a. Chhiah leh thil dang man tih san, midang kuta airport hlan tum, tih ang chi te, mipui nawlpui tana harsatna thleng lo zawng leh inrawn tlang a, zai ngai zawka kal a ngaihna pawh a awm thin, tiin, tlawmngai pawl leh zirlai pawl dodalna pawh engmahmaha ngai loin ZPM sawrkar chuan mipui chu thuneihna min lek khum mek tih a sawi a ni.
Inthlang turin MNF kan inpeih at – Dr R Lalthangliana
