ZPM sawrkar thar that leh that loh chu an intiam angte an tihlawhtling em tih a ni anga, chu chu mipuiin kan tehna tur pawh a ni dawn a. BJP MLA-te chu constructive opposition role play turin an beisei tih BJP Mizoram president Vanlalhmuaka chuan a sawi.
Zirtawpnia an party office-a political session an neihah BJP State president chuan Mizoramah ZPM sawrkar thar a piang ta a, an intiam anga ‘mipui sawrkar’ an siam an beisei tih a sawi. BJP chu Mizoram leh hnam tana ding a nih avangin sawrkar thar piang pawh an tlin lohna leh fel lohna ringawt chhuia bei loin, constructive opposition role play turin BJP MLA-te an inbuatsaih an beisei tih a sawi a. ZPM chuan Mizoram siamtha tura an intiam angte an tihlawhtlin ngei theih nan duhsakna an hlan a; an thutiamah an ding em, Mizoram tana tih tura an puanchhuah leh an manifesto an hlenchhuak em, tih chu sawrkar tha tehna tur a nih avangin, an intiam anga hna an thawh a, an manifesto an tihhlawhtlin chuan result tha tak an nei tih a lo lang mai dawn tih a sawi a ni.
BJP manifesto neih, Mizoram mipui tana an duante tih theih a nih dawn tak loh avangin pawi a tih thu Vanlalhmuaka hian sawiin, “A bikin ZMC ringawt pawh RIMS-a upgrade tura kan tih chu ti thei dinhmuna kan din tak loh avangin phai lam pan ngai thinten kan la pan fo a ngai leh dawn a, kan manifesto-a kan tarlan Mizoram hmasawnna atana kan duan, central-in min hriatpuite chu Mizoram mipuiin kan la mamawh loh avangin, mamawh hun kan neih veleh mipui zarah sawrkarna kan la chang ve ngei ang,” a ti.
Intiam ang an tihlawhtling em tih hi kan tehna tur a ni – MBJP president
