Intodelhna atan organic thlai lam uar turin Union minister-in ch

Intodelhna atan organic thlai lam
uar turin Union minister-in chah
Organic thei leh thlai chu khawvelin a ngaihsan tawh avangin, India ramah ngei pawh duh bik an tam tawh a, Mizoramin heti lam a uar chhoh chuan state intodelhna atana pawimawh tak tur a ni tih Union minister of state Shobha Karandlaje chuan a sawi.
Union minister of state for Labour & Employment Shobha Karandlaje hian zan khat riakin Mizoram a rawn tlawh a. Ningani khan Delhi lam a pan leh hma in Aizawlah thuthar thehdarhtute a kawm. Organic hmanga thlai thar chu Mizoram dinchhuahna atan a pawimawh tih sawiin, ngun taka zirchiangin organic farming hmanga intodelhna kawng zawh theih chuan, India ramah ngei pawh demand a sang a, organic thlai hmangin Mizoram a intodelh thei tih a sawi.
Lengpui Airport chu thlai leh thei thawnchhuah theihna turin Krishi UDAN Scheme hnuaiah tih changtlun tum a ni tih a sawi a. Kuminah tih fel hman beisei a ni tih a sawi. Mizoram thlai thar chhuah dahthatna tur a tam thei ang ber siam a pawimawh, tiin, kan thlai thar chhuah dahthatna tur cold storage siamna tur project centre-ah a rang thei ang bera state sawrkarin dilna siam a tul tih a sawi a ni.
Mizoram telin India hmarchhak atangin thalai hna thawka hmun danga chhuak an tam rualin, ‘house maid’ an tam leh lutuk chu her rem hret ngai nia a hriat thu MoS for Labour & Employment hian a sawi a. Thiamna bik nei, a bikin health sector-ah doctor leh nurse mamawhna khawvel huap angin a sang a, chutiang lam chherchhuak tam tur chuan state sawrkarin ruahmanna a neih thiam a ngai a, state sawrkarin ruahmanna tha a siam chuan sawrkar laipui chuan a tih tur a ti ngei dawn tih a sawi a ni.
Sawrkar laipuiin khua leh tui, a bikin khawsak harsa te chawikanna tur ruahmanna tha tak tak a duang thin a, tunhma atangin Mizorama sawrkarin a ngaihven tawk lo thin a, state mipuiin an chhawr tangkai loh phah thin tih a sawi.
e-Shram chungchang pawh state sawrkarin mipuiah zirtirna tha tak a pek a ngai, tiin, e-Shram hi Mizoram mipuiin an chhawr tangkai a ngai a, sawrkar hnathawk lo, mahnia ei zawng, kuthnathawktutete e-Shram ah in-register vek turin a sawm tih Shobha Karandlaje hian a sawi a ni.
BJP Mizoram hruaitute ruahmanna in Union MoS hi Hnahlan Grape Grower Association leh Mizoram Chamber of Commerce and Industry hruaituten hmuin an mamawh an sawipui a, ziakin an thlen bawk.