IOC-in Mizoramah electric
charging station 20 siam tum
Indian Oil Corporation Ltd chuan electric current hmang vehicle tan Mizoramah electric charging station 20 siam a tum.
Indian Oil Corporation State office executive director & sales head Rajesh Nambiar chuan Nilaini khan chief minister Lalduhoma chu a office-ah a kawm a. Oil depot lama hma an lakna bakah Mualkhang Gas Bottling Plant tharthawh tuma an bawhzuina, electric vehicle a pun zel avanga charging station engemawzat siam tura hma an lakna, IOC-in CSR hmanga Mizorama hna an thawhte a hrilh. CSR hmalaknaah hian hmachhawp pawh an la nei nual tih a sawi a ni.
Chief minister hian oil depot neih thuai an duh a, a hmun thlan tur pahnih an chhawp tawh tlang fel rang a, hnathawh theih hun (working season) a intan tawh avangin hna tan thuai se an duh tih IOC hotu hi a lo hrilh.
Document an neih ho headquarters lamah an thehlut tawh a, zawhna tlem azawng an rawn zawt leh a. Reiloteah oil depot hmun tur hi an thlanfel mai a ring tih Rajesh Nambiar hian sawiin, an thlanfel chuan kum hnih chhunga sak zawh theih a beisei tih a sawi a ni.
IOC hian Mizoramah petrol pump 72 a nei mek a, electric charging station 20 siam tumin hma an la mek bawk. Mualkhang Bottling Station site development an thawk tan a, tunah pawh a hungna tur tender an tichhuak tawh. Local contractor-ten an hna hi ngaihven ve se an duh tih IOC executive director hian a sawi.
IOC-in Mizoramah electric charging station 20 siam tum
