Pegasus mistery thlen hnuah sorkar agency-te rinhlelhna nasa tak a awm leh ta, tiin senior Congress leader P. Chidambaram chuan opposition leader thahnem tak tena an Apple iPhone-in ‘state-sponsored’ attack a tawk an tih hnuah a sawi.
Tun dinhmunah chuan rinhlelhna a la ni rih, tiin Chidambaram chuan a sawi bawk a. “Opposition leaders za rual te chuan Apple hnen atangin an phone chu state-sponsored attack an tawh thu an sawi a. Eng vangin nge Opposition leaders te chauhin beih an tawh? Tute nge Opposition leaders te phone bik chu ngaihtuah em em bik ang” tiin Union Home Minister hlui chuan a sawi bawk a.
“Pegasus mystery thlen hnuah (tun thlengin chinfel a la ni lo), sorkar agency te rinhlelh berin an awm leh mek a ni. Tunah erawh rinhlelhna mai chauh a la ni,” tiin Congress leader chuan a sawi bawk a.
Thawhlehni khan opposition leader thahnem tak te chuan Apple hnen atangin an phone chu hack tuma beih a nih thu an sawi thu sawiin heng thil titu a sorkar puhna chu IT Minister Ashwini Vaishnaw chuan a hnawl nghal thung a. Mahse, Minister chuan chhui chian nghal a intiam thung a ni.
Apple atanga an phone-in beih a tawk tia hriattirna dawngtu zingah Congress chief Mallikarjun Kharge, party leaders Shashi Tharoor, Pawan Khera, K.C. Venugopal, Supriya Shrinate, T.S. Singh Deo and Bhupinder S Hooda; Trinamool Congress MP Mahua Moitra; CPI(M) general secretary Sitaram Yechury leh Samajwadi Party chief Akhilesh Yadav te pawh an tel a.
Anni bakah hian Shiv Sena (UBT) MP Priyanka Chaturvedi, AAP’s Raghav Chadha, AIMIM president Asaduddin Owaisi bakah Congress MP Rahul Gandhi thuihhruai hnai te pawhin notification an dawng a ni.
Yechury leh Chaturvedi te chuan Prime Minister Narendra Modi hnenah ziakin an thlen nghal a, Moitra erawh chuan Lok Sabha Speaker Om Birla hnenah lungawilohna a thlen thung a ni.
iPhone attack thu kal zelah rinhlelhna thar
