Apple chuan nimin khan kumin atana an event lian ber tur neiin, iPhone 17 series an tlangzarh a, iPhone 17, iPhone 17 Pro leh iPhone 17 Pro Max te awmin, iPhone Air an tlangzarh tel bawk.
iPhone Air hi 256GB, 512GB leh 1TB storage awmin, India-ah Rs 1,19,900, Rs 1,39,900 leh Rs 1,59,900 man te a ni dawn a, iPhone 17 hi 256GB leh 512GB storage awmin, Rs 82,900 leh Rs 1,02,900 man a ni ang a, iPhone 17 Pro chu 256GB, 512GB leh 1TB storage awmin, Rs 1,34,900, Rs 1,54,900 leh Rs 1,74,900 man te a ni ang a, iPhone 17 Pro Max chu 256GB, 512GB, 1TB leh 2TB storage awmin, Rs 1,49,900, Rs 1,69,900, Rs 1,89,900 leh Rs 2,29,900 man te an ni ve thung ang. iPhone 17 series hi pre-order an hawng nghal a (iPhone Air bik hi September ni 12 atangin), September ni 19 atangin an hralh chhuak tan ang.
2025 iPhone lineup te hian 120Hz refresh rate an nei vek a (a hma chuan Pro model-ah chauh a awm), Aluminium frame pawh iPhone 17 Pro leh iPhone 17 Pro Max-ah te an rawn hmang leh ta a, a model zawng zawngin 48 megapixel Fusion camera an nei vek tawh bawk.
Apple iPhone Air:
Apple iPhone Air hi iPhone an siam tawh zinga pan ber a la ni a, 5.6mm leka chhah niin, Apple chuan an kutchhuak phone zinga tlo ber ni tura an ngaih thu an sawi a, titanium frame neiin ceramic shield a thuam a ni bawk. He smartphone hian 6.5-inch Super Retina XDR display neiin, ProMotion, 120Hz refresh rate leh 3,000 nits peak brightness a nei bawk.
Apple iPhone Air hian A19 Pro chip neiin, iPhone chip-ah chuan a chak ber a la ni bawk. Hetiang chip tho hi iPhone 17 Pro model-ah te an hmang tel a, Apple-built C1x modem a nei tel a, hei hi C1 aiin a let hnihin a chak zawk niin an tarlang.
A hnungah 48 megapixel Fusion camera system leh 12 megapixel telephoto lens neiin, a hnung leh hmalam camera ten a rualin video an record thei. Selfie atan 18-megapixel camera neiin, Center Stage a support a, call lai pawhin a frame-ah mi an lang kim vek thei.
iPhone Air hian N1 chip a nei thar a, Wi-Fi 7, Bluetooth 6 leh Thread a support a, company lam chuan a battery pawh nileng hman daih niin an chhal a, video playback darkar 40 a daih niin an chhal bawk.
iPhone Air hian e-SIM chauh a support avangin a battery a lian thei ta deuh a, hei bakah hian a feature langsar deuhah chuan Action button neiin, heta tang hian awlsam zawkin function hrang hrang a access zung zung theih a, rang taka thlalak theih nan Camera Control a nei bawk.
Apple iPhone 17:
iPhone 17 hian 6.3-inch screen neiin, 120Hz refresh rate, 3,000 nits peak brightness bakah always-on feature a nei a. A screen hi Ceramic Shield 2 a thuam niin, rang mai mai lo tura ngaih a ni a, ni êng hnuaiah pawh hman nuam turin special coating a nei bawk. iPhone 17 hian A19 chip neiin, a chip chak zawk leh screen rang zawk nen mobile gaming pawh smooth lehzual tura ngaih a ni.
A camera system an update a, company lam chuan ‘dual fusion’ system an ti mai a, 48 megapixel primary camera leh 2x telephoto lens te chu camera pakhatah an bilh khawm a, hei bakah hian 48 megapixel ultra-wide camera a nei tel bawk. A hmalam camera pawh square-shape niin, 18 megapixel camera a nei a, landscape selfie pawh phone ken dan thlak chuang lovin a lak theih a, video call a nawm zawk nan Center Stage feature a nei bawk.
Apple iPhone 17 Pro:
iPhone 17 Pro ian 6.3-inch Super Retina XDR display neiin, ProMotion up to 120Hz a support a, Always-On mode neiin, 3,000 nits peak brightness a nei bawk. A screen pawh Ceramic Shield 2 a thuam a ni. Apple chuan he smartphone siam nan hian aerospace-grade 7000-series aluminium hmangin unibody design a nei, phone hman rei avanga a sa tur ven nan vapor chamber a nei bawk a, battery pawh iPhone siam tawha daih rei ber tur niin an chhal.
iPhone 17 Pro hian A19 Pro chip leh 6-core CPU neiin, a tichak lehzual turin neural accelerator leh 16-core Neural Engine a nei bawk a, a performance pawh chak vet vet tawh tak tur a niin, advanced AI processing leh console-level graphics te pawh harsatna awm lo tura ngaih a ni. N1 wireless chip neiin, Wi-Fi 7, Bluetooth 6 leh Thread a support bawk.
iPhone 17 Pro hian three-camera Fusion system neiin, 48-megapixel Main, 48-megapixelUltra Wide leh 48 megapixel Telephoto lens a nei a, a Telephoto camera feature-ah tetraprism design awm tharin up to 8x optical zoom a nei a, iPhone-ah chuan zoom tha ber a la ni. A hmalamah 18-megapixel Center Stage camera neiin, field-of-view zau zawk, selfie tha zawk leh 4K HDR video record a support. A hnung leh hmalam camera hmangin a rualin video a record theih bawk.
iPhone 17 Pro hian Dolby Vision HDR, ProRes RAW, Apple Log 2, leh genlock te neiin, a camera pawh professional product deuh zaih tura ngaih a ni a, iOS 26 hmangin, Apple Intelligence feature neiin, hetah hian Live Translation, visual intelligence tha zawk, offline foundation models leh communications tools changtlung zawk a nei nual bawk.
Apple iPhone 17 Pro Max:
iPhone 17 Pro Max hian 6.9-inch Super Retina XDR display neiin, ProMotion up to 120Hz, Always-On, leh peak brightness 3000 nits a support a, a hma leh hnunglam hi Ceramic Shield 2 a thuam niin, iPhone hmasa te aiin a let thumin a hmai rang/khi har zawk tura ngaih a ni.
A19 Pro chip hmangin, vapor chamber cooling system a neih avangin 40%-in hman rei avanga a sat vanga performance hloh tur a tihniam thei niin an tarlang a. Unibody aluminium design a neih avangin a battery a lian thei deuh zawk a, iPhone zinga battery daih rei ber tura ngaih a ni a, company lam chuan 40W USB-C adapter-in a battery pawh minute 20 chhungin 50% a charge hman niin an chhal a, a battery hian video playback darkar 39 a daih niin an chhal.
A camera chu iPhone 17 Pro nen a inang a, chutihrualin a thlalak te hi 40x digital zoom a support a, a feature dang pawh iPhone 17 Pro nen a inang.
iPhonen Air leh iPhone 17 series tlangzarh
