Daily Newspaper

I&PR minister-in Serchhip Press Club a hawng

10

Information and Public Relations department changtu minister Lalruatkima chuan nimin khan Serchhip Press Club, Serchhip Field Road-a sak chu a hawng a, thuthar thehdarhtute chu thlei bik nei lova thuthar thehdarh thin tura a beisei thu a sawi.

Minister Lalruatkima chuan Mizoram journalist-te chu thlei bik leh awn lam nei lova thuthar thehdarh thin, zahawm leh inthununna tha tak nei mi ni tura a beisei thu sawiin, journalist-te chu mipuite tibengvartu leh zirtirtu an nih avangin inpe zo taka an hna an thawh chuan ramin a hlawkpui thin a, sawrkar policy puanzar kawngah pawh an pawimawh em em a ni, a ti a. State dang journalist-te tih ang ti ve thei leh pawl phak tura Mizoram journalist-te a beisei thin thu leh, Mizoram leh mipuite zau zawka pho chhuah lama tan lak zel a pawimawh thu a sawi a. Zo nun ze mawi inzirtirna lam te, social media-a mipuite rilru tibuai thei laka invenna lam te leh nun kawng dik inzirtirna lam te uar deuh deuh turin thuthar thehdarhtute chu a chah nghal a ni.

Minister hian Journalist te tana sawrkarin hamthatna a duan mekte tarlangin, Journalist Welfare Fund tha taka kalpui mek a nih thu te, tun hnaia Press Tour vawi nga buatsaih a nih thute leh Journalist Pension Scheme duan mek a nih thute pawh a sawi a ni.

Press Club hawnna inkhawm, C. Ramengmawia, Vice President, MJA, Serchhip kaihhruaiah hian Kapliana Pachuau, President, MJA, Serchhip pawhin thu sawiin, Press Club a puitlin theih nana sum leh pai leh thilpek petute chungah lawmthu a sawi a, I&PR Minister-in an sawmna ngai pawimawha Press Club a hawnsak avangin lawmthu a sawi bawk a ni.

Serchhip Press Club hawnnaah hian Zonunsanga Khiangte, President, MJA General Headquarters pawhin thu sawiin, Press Club thar lawmna thilpek a hlan bawk.

Press Club sak nan hian kum 2018 khan Lal Thanhawla, khatihlaia bialtu MLA leh Chief Minister ni bawk chuan NEDP atangin cheng nuai 10 a pe a, a hnuah Ronald Sapa Tlau, khatihlaia MP, RS chuan a Fund atangin cheng nuai 2 a pe bawk a. Mi thahnemngaite hnen atanga thilpek an dawn te nen, he Press Club hi floor pakhat luah theihin peih a ni a, a building len zawng hi metre 40×60, chhawng ngaa sang a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy