Tehran-a Indian Embassy-in kaihhruaina siam that a tihchhuahah himna dinhmun a that tan mek zel thu sawiin zin erawh pawimawh leh loh theih loh tih loh chu la pumpelh zel turin mipuite a chah zel tho.
Embassy chuan Iran-a himna dinhmun chu uluk takin a thlir reng tih sawiin tun hnaia thil tha zawk thleng leh dinhmun tha zawk thlirin kaihhruaina an tihchhuah pawh an tidanglam tih an sawi a. Heti chung hian ‘Indian-te chu hriattirna dang a awm hma chu thil pawimawh bik a nih loh chuan zin pumpelh tur’ tiin an chah.
Iran-a cheng Indian-te bakah pumpelh theih loh vanga zin ngaite chu engtik lai pawha fimkhur turin an ngen a, boruak inlumlet thlir thiam turin an ngen bawk a. Kaihhruaina thar chuan tual chhunga thil thlengte chu thu hriatna rintlak hmanga ngun taka enfiah tur leh Iranian thuneituten thupek an siam zawm turin an ti bawk.
Embassy chuan tuna Iran-a awm mek Indian zawng zawngte leh thleng turte chu hun remchang hmasa berah mission-ah an chanchin kimchang ziak lut turin an ti a. Indian-te chu Embassy official website leh social media-ah thil thleng thar leh inkaihhruaina en fo turin an ngen bawk.
Kaihhruaina thar hi embassy-in Iran-a himna dinhmun tha hret mah se boruak a la tang ru viau tho nia a sawi laia tihchhuah a ni a. US leh Iran inbiakna thawh hmasa ber, buaina tihtawp tura inremna siam tumna chu palai, Qatar leh Pakistan-te chuan ‘hmasawnna tur kawng hawnna’ tia sawiin an tawp rih.
Thawhtanni tuk khan thuchhuah intawm siamin Qatar leh Pakistan chuan ni 60 chhunga inremna kimchang siam tura hmalak dan tur an siam thu an sawi a. Kar hmasa khan Tehran leh Washington chuan ni 40 dawn an indo hnuah inbiakna atana lungphum phum turin inremna thuthlung an ziak a, a thawh khat nan an inbe zui tawh a ni.
Iran boruak tha hret mah se zin a la him tawk lo – India
