Daily Newspaper

Iran in Soleimani phuba an lak ngei tur thu sawi

11

Iran Revolutionary Guards chief chuan Tehran chuan US in an top commander General Qasem Soleimani a thahna chu phuba a lak ngei tur thu a sawi.

Iran sipai tha chungchuang thlan khawm Qods Force hotu lu ber Soleimani kha kumin January thlaah Baghdad airport bulah US indo thlawhnate chuan an kaphlum a ni.

Hetihlai hian US media te chuan Iran chuan phuba lak nan South Africa-a American ambassador Lana Marks chu kumin November presidential election hmaa thah an tum thu an sawi bawk.

He media report avang hian kar kalta khan US President Donald Trump chuan Iran chu vau nawnin US an bei a nih vaih chuan chhanletna an tawn tur chu ‘a let sanga naa ni ang’ tiin a sawi.

Hetihlai hian South Africa state security agency te chuan US ambassador thah tumna finfiahna engmah an neih loh thu an sawi thung a.

Iran Revolutionary Guard chief Major General Hossein Salami chuan US President Trump vauna chu chhang letin, “Mr. Trump, kan commander ropui phuba kan lakna tur hi a chiang a, a tak ang a, a turu bawk ang. Zahawm takin phu tawk ang ngeiin phuba kan la ang,” tiin a IRG official website Sephahnews-ah tarlan a ni a.

“South Africa a hmeichhe ambassador lakah kan unaupa martar thisen phuba kan lak i ring em ni? Kan mi ropui thihnaa a lang leh lang lova inrawlh te lakah phuba kan la ang,” tiin a sawi bawk a.

‘I hriat tur chu a inhnamhnawihtute pawh kan bitum dawn a, hei hi hriattirna nasa tak a ni e,” a ti bawk.

Soleimani kha drone air strike hmangin Iraqi commander Abu Mahdi Al-Muhandis nen tihhlum an ni a.

Thah a nih tukah Iran chuan Iraq-a US base te chu missile hmangin a bei zui nghal a. Mahse, Trump chuan a chhang let zui duh ta lo thung.

Washingon leh Tehran inlaichinna hi kum 1979 a Islamic Revolution atangin a chhe em em reng a.

President Trump an May 2018-a US sorkar Barack Obama kaihhruaia Iran nuclear deal atanga a inhnuhdawha a hrek chhunzawm hnuah a chhe zual leh ta zual a ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy