Austria-a mi pakhatin chemte nena mi beia kum 14 mi a thah leh mi dang panga a hliamna chu Austrian thuneitute chuan Islamist beihna ni ngeiin an sawi.
Mi beihna hi Inrinnia Italy leh Slovenia nena an inrina bul lawk, Villach khuaa thleng niin hliam tuar zinga pathum hi intensive care-a awm an la ngai tih an sawi.
A titu nia sawi hi kum 23 mi Syrian a ni a, Austria-a awm dil mek niin a hmunah hian man nghal a ni a, tualthah leh mi thah tum thubuai siamsak a ni.
Interior Minister Gerhard Karner chuan a titua puh chennaah Islamic State pawl flag an hmuh thu a sawi a, state police chief Michaela Kohlweiss pawhin he pawlah hian a rinawm hle niin a sawi ve bawk.
Pathiannia thuthar lakhawmtute a kawmnaah Karner chuan beihna an tawrh kha ‘Islamist beihna, a titu pawh IS nena inzawm a ni tih chhuituten an hriat chinah chuan a lang a, hun reilo te chhungin chibil thil internet-ah a tar lang teuh’ tih a sawi.
“A mawhphurtute an nih angin police leh thuneituten a tul angte chhui chhuak turin hma an la zel a ni,” a ti.
Karner-a chuan a titua puh hi dan ang thlapa an rama chenna nei leh pawi a khawih chhinchhiah la ni lo a ni a, tun hmain thuneitute mit tikham zawnga chetna a la nei lo niin a sawi.
A hmain thuneitute chuan a titu hi an rama awm ngheh phalna la nei lo, awm ngheh a dilna ngaihtuah mek niin an lo sawi tawh.
Thuneitute chuan Pathianni khan hliam tuarte hi kum 15 pahnih leh kum 28, 32 leh 36 an nih thu an sawi a. Turkish pakhat tih loh chu Austrian vek an ni.
Pathum chu intensive care-ah awmin pakhat dinhmun erawh a ngaihtuah awm lo va, pakhat phei chu outpatient treatment chauh a dawng niin an sawi.
Mi thil pe kualtu, Syrian pakhatin a lirthei atangin mi beihna thleng hi hmuin a titu hi a dang bet a, hliam tuar tam zawk tur pawh a dang niin police chuan an sawi.
Beihna thleng hi Austria-a an rama awm dil an phalsak thin danin sawi a hlawh mek lai a ni a. Karner-a chuan police leh thuneituten an lo endik uluk lehzual nan an kalphung chu ‘dan anga ennawn’ an mamawh niin a sawi.
IS nen Austria-a mi vihna thleng inzawm
