Democratic Republic of Congo khawchhak lama Islamic State nena inzawm ralthuam keng pawlin an man civil mi 200 chuang chu sipaiten beihpui thlakin chhanchhuah an nih thu an thenawm ram, Uganda-a sipaiten an sawi.
Ugandan sipaite hian Congolese sipaite nen thawkdunin Uganda atanga indin hel pawl, Allied Democratic Forces (ADF)-in an thunun camp an bei a ni.
Chhanchhuah zingah hian naupang pawh an tel a, a naupang ber chu hmeichhia kum 14 mi a ni tih Ugandan thuchhuah chuan a tar lang.
ADF hi Uganda-ah kum 1990 chho vela sorkarin Muslim-te a enkawl dana lungawi lo miten an din a ni a. Sipaiten an hneh loh hnuah a la bângte chu ramri kânin an tlanchhia ta a ni.
Kum 2021 khan Uganda leh DR Congo chuan Congo atanga ADF hnawhchhuah tumin beihpui an thlak dun a, tun thlengin an la chhu chimit thei lo va, an la bei chhunzawm zel.
Civil mi chhanchhuahte hi engtika ruk bo nge, khawiah nge an rukbo tih hriat a la ni lo va, Ugandan sipai thuchhuah chuan mi mante hi ‘sal tangte dinhmun khirh tak, ei tur tlakchhamna, hnathawhtir leh thu awih loh vanga hrem’ an ni thin tih an tar lang.
Thenkhat chu an taksa a chak lo hle tih a lang a, malaria, thawk harsa leh hah lutuk an vei niin thuneitute chuan an sawi.
Uganda leh Congo beihpui thlak dunna kaihruaitu, Maj Gen Stephen Mugerwa-a chuan chhuah zalente hnena a sawi danin, “Ruk bo tuar in ni a, thuneitute hnenah hlan in ni ang a, in chhungte nen in inhmu leh thei ang,” a ti.
Sipaiten camp an beihnaah hian ADF fighter eng emaw zat an thi tih an sawi a, ralthuam dahkhawmna hmun pawh an hmuchhuak a. Thuchhuahah hian Uganda emaw, Congo emaw sipai zingah thi leh hliam an awm leh awm loh a tar lang lo.
ADF helte hian kum 20 kalta chhung khan DR Congo chhung atangin hma an la thin.
An hruaitu, Musa Seka Baluku-a chuan kum 2016 khan IS-ah rinawmna thu a tiam nia sawi a ni a; mahse, April, 2019 khan IS hian he hmuna an hmalakna hi an hre chauh nia sawi a ni bawk.
Kum tam tak chhung chu Uganda-a langsar taka an chet loh hnuah tun hnaiah ADF hi pawikhawihna thleng hrang hrangah a titua puh an ni a, kum 2021 khan Ugandan khawpui, Kampala-a thihchilh bomb puak leh kum 2023-a Uganda khawthlang lama sikulte beihnaah mawhphurtua puh an ni.
Hetih lai hian DR Congo khawchhak lama mi an ruk bo leh thah chu hriat lansarh berna an ni.
IS nena inzawm pawl kut atangin mi 200 chuang chhanchhuak
