ISL buainain player-te a tibuai lo – Jamil
CAFA Nations Cup khel tur squad puan a nih ruala press conference a hmachhawnah Indian football team head coach Khalid Jamil chuan tunlaia Indian top flight Indian Super League (ISL) buai mekin national team a nghawng loh thu a sawi.
Tarlan tawh thin angin, Indian football-in harsatna lian tak a tawk mek a; AIFF leh sumdawnna lama an thawhpui FSDL inkara contract kal lai chu kumin December thla hian a tawp tawh dawn a, inremna thar ziah chhunzawm tur a nih laiin Supreme Court a inrawlh a, AIFF constitution duan mek pawm fel a nih hma chu thawhdunna thuthlung thar ziak tura AIFF leh FSDL inbiak a remti lo a, chu chu ISL buaina bulpui a ni.
Tunhnaiah Supreme Court hian a thu zukin constitution peih a nih hma pawha inbiak phalna a pek leh tak si avangin inbiakna an tan leh mek a, tun dinhmunah Indian top flight season thar tan hun tur erawh hriat mai theih a la ni rih chuang lo.
He boruak teh nuaiah hian ISL player tha ber berte chu national camp lamah boss thar Jamil chuan CAFA Nations Cup hmachhawn turin a hrual mek a, Aizawl FC head coach hlui hian a squad chu chona hmachhawn tura an inpeih tawh thu leh tunlaia ISL buainain team chhungah harsatna a thlen loh thu chanchinbumite a hrilh.
Hetih lai hian Indian Super League champion Mohun Bagan Super Giant chuan India camp lut tura koh an player pasarihte a chhuah duh lo a, an tan fung pawh Nations Cup khelh hun tur hi Fifa international window a nih loh vang leh Fifa-in player hum theih loh a tih hun chhunga tla a nih loh vanga national team-a kaltir duh lo an ni.
Spaniard Manolo Marquez thlaktu Jamil chuan Thawhtanni khan camp lut tura player 20 a khawm atangin tournament khel tur player 23 a thlangchhuak fel tawh a, he final 23-member squad-ah hian Mizo player pahnih Lunglei forward Lallianzuala Chhangte leh Durtlang defender Hmingthanmawia Ralte an tel nghe nghe.
Jamil chuan India head coach a nih hnua national camp-a press conference a hmachhawn vawi khatnaah hian harsatna thenkhat awm tarlangin, club thenkhatin chhan engemaw vanga player thenkhat an chhuah duh loh thu a sawi a, squad-a a sengluhte erawh ISL boruak chiri takin a tihbuai loh thu a tarlang tel.
Blue Tigers boss hi media mite chuan zawhna an zawt a, top-tier league organiser FSDL lamin ISL an tan rih loh avangin a player-te an chi-ai em, chu chuan ram tana tournament khel tura an inbuatsaihnaah nghawng tha lo a thlen em tih an zawhna chhangin, “Rilru lama harsatna an neih ka hre lo a, ISL tan mai theih lohin a tihbuai awm ka hre lo.
“Khelmual an luh huna an tihtur theuh an chiang a, hna thawh tur an nei tih an inhria a, tournament kan khelh hunah pawh eng chhuanlam mah kan nei dawn lo.
“Camp chhunga mi zawng zawng kan thawkrim a, kei pawhin player leh AIFF top brass atangin thlawpna awm thei zawng zawng ka dawng mek a ni.
“Tun hi ka tan chona lian a ni a, tuna ka player kawl mekte nen erawh eng harsatna mah kan nei lo. Ka player duh ang chu ka hmu a, ka tan chuan ka player neihte atanga a tha ber sawrchhuah hi hna pawimawh niin, player-te nungchang pawh a tha vek .
“Player chhuahtir duh lo awm bawk mah se Sandesh Jhinghan, Gurpreet Sandhu leh Anwar Ali tihte an awm a, player hmel thar hmuh tur an awm bawk a; an zavaiin an rilru puthmang leh sukthlek pawh a dik vek a ni.
“Camp chhung ka kaihruai a, he team hi a chak lo a ni tiin ka ngaihtuah ngai lo. Ka kianga awm mek player-te hi an tha em em vek a ni tih hi ka pawm dan a ni,” tiin CAFA Nations Cup hmachhawn tura an inbuatsaihna boruak a sawifiah.
Tarlan tawh thin angin, India hi Group B-ah a thlengtu pakhat zawk Tajikistan, defending champion Iran leh Afghanistan-te nen awm hoin, vawiin, August ni 29 hian Hisor khuaah mualneitu Tajikistan tumin tournament bul an tan dawn a; September ni 1-ah Asian giants Iran hmachhawn leh tur an ni a; September 4 khian Afghanistan an su leh ang.
Third-place match chu September ni 8 khian Hisor-a khelh tur niin, final match pawh he mi ni vek hian Tashkent (Uzbekistan) lamah an khel nghal ang.
He tournament atana national camp chu August ni 16 atang khan New Delhi-ah tan niin, 23-member squad-ah hian Indian keeper hlun Gurpreet Singh Sandhu pawh a kir a, hei hian squad pawh tiphuisui sawt tura beisei a ni.
India squad
Goalkeepers: Gurpreet Singh Sandhu, Amrinder Singh, Hrithik Tiwary.
Defenders: Rahul Bheke, Naorem Roshan Singh, Anwar Ali, Sandesh Jhingan, Chinglensana Singh, Hmingthanmawia Ralte, Muhammed Uvai.
Midfielders: Nikhil Prabhu, Suresh Singh Wangjam, Danish Farooq Bhat, Jeakson Singh, Boris Singh, Ashique Kuruniyan, Udanta Singh, Naorem Mahesh Sing.
Forwards: Irfan Yadwad, Manvir Singh (Jr.), Jithin MS, Lallianzuala Chhangte, Vikram Partap Sing.
Head Coach: Khalid Jamil.