ndian club football-in harsatna lian tak a tawk a, top flight Indian Super League (ISL) huaihawt tura All India Football Federation (AIFF)-in a thawhpui Football Sports Development Limited (FSDL) leh AIFF inremna chu kumin December thlaa awp tawh tur a nih lain pawl pahnih hian inremna thar an ziak thei ta lo a, ISL season thar pawh tun thlenga tan theih a ni lo a, hei vang hian club lam an lungawi lo hle tawh a, na taka an nawr hnuah AIFF chuan ISL organiser ni duhte tana dil theih turin tendar a tichhuak ta hram a ni.
He tender hi request for proposal (RFP) an ti a, RFP chhangtute zinga thlan chhuah company chuan kum 15 (2025-2040) chhunga ISL huaihawt phalna (commercial rights) an nei leh dawn a ni. FSDL leh AIFF pawh khan ISL huaihawt turin hei zat kum daih tur hian inremna an lo ziak tawh a, kumin December ni 9 khi an thawhduna tawp hun tur a ni.
Indian football federation thuchhuahin tarlan danin, RFP chhangtu company hlut zawng chu a tlem berah Rs. 250 crore tal a ni tur a ni a, ISL organiser ni tura thlanchhuah chuan kum 15 chhung hian kum tin AIFF hnenah cheng vaibelchhe 37.5 zel a chhunglut ang!
AIFF thuchhuahin a tarlan zel danin, Indian Super League commercial rights hian broadcasting, sponsorship, marketing, leh merchandising a huam dawn a; chu mi awmzia chu – ISL organiser chuan AIFF lama sum hraw tak kumtin an chhunluh rualin TV leh media lama thehdarhna man sum bakah sponsorship atangin sum an huilut thiang dawn a, ISL kaihhnawih sumdawnna hrang hrang chu an chanpual a ni bawk ang.
He tender hi ISL club 10 lungawi loin inthuruala an lawm lohna AIFF hnena an thlen ni tak, tunkar Ningania tihchhuah kha a ni a; president Kalyan Chaubey kaihhruai federation chuan beidawn tawh lamah tender a tichhuak ve ta phawt a, a hmaa AIFF thawhpui FSDL lamin an hlawkpui loh dan enin Indian club football-a sum tam tham zet senral (invest) hi company lian hote hian chak tak ang maw?!
Ziaka lungawilohna hlentu club 10-te chu Chennaiyin FC, Punjab FC, Hyderabad FC, Bengaluru FC, FC Goa, NorthEast United, Kerala Balsters, Odisha FC, Jamshedpur FC leh Mumbai City FC-te niin, Kolkata club pathum – Mohun Bagan Super Giant, East Bengal leh Mohammedan Sporting-te chuan he lehkhathawnah hian hming an ziak ve lo thung.
All India Football Federation hian kumin December thlaah chuan Indian Super League tan hman an beisei thuin club lungawi lo an lo hmachhawn tawh a, an tiam hunah hian ISL an tan hman dawn em kan thlir ang.
ISL club nawrna hnuaiah AIFF-in tender an chhuah ve ta nge nge
