Hamas chuan tun thla chhungn an hruaitu thar tur an thlang dawn nia hriat a ni a, ani hian Israel-in kum 2024-a an thah tak, Yahya Sinwar-a ai a awh dawn a ni.
Khalil Al-Hayya leh Khaled Meshaal chu Islamist ralthuam keng pawl hruaitu ber ni tura rinkai pahnih an ni mek a. An pawl hi October 7, 2023-a Israel an beih hnua an laka beihpui thlakna avangin an tlachhe nasa tawh a, ram tam takin an ralthuam tung turin an phut bawk.
Thlan tura rinkai pahnih hi Qatar-a awm mek ve ve niin October 7-a an chetnaa bultumtu ber, Sinwar-a a thih hnua Hamas kaihruaitu ber mi panga awmna council-a tel ve ve an ni a. Sinwar-a’n a thlak tak, Ismail Haniyeh pawh Israel-in kum 2024 vek khan Iran a tlawh laiin an that a ni.
Inthlan tur hi buaipui mek nia hriat a ni a. Hruaitu hi secret ballot hmangin Hamas-a Shoura Council an tih, mi 50-ten an thlan tur niin council-ah hian Israeli-in a awp West Bank, Gaza Strip leh ram danga biru mekte pawh an tel a ni.
Hruaitu thlan tur chungchang hi Hamas thupuangtu chuan engmah a la sawi lo thung.
Sinwar-a aiawhtu tur thlan a nih rual hian a thachhangdawltu, Israel thovin kum 2024-a thlawhnaa an beiha Lebanon-a an thah, Saleh Al-Arouri-a aiawhtu tur pawh an thlang tel dawn nia sawi a ni bawk.
Hamas chinchang hre deuhte chuan Meshaal-a hi Sunni Muslim ramte nena inhnimhnai a ni a, Hayya-a hi an pawla mi dawrnaa an hotu ber a ni thung tih an sawi a, Iran nena an inkungkaihna atana an indawrnaah pawh a tangkai hle niin an sawi.
Hamas hian kum 1987-a an din hnua chona lian ber an hmachhawn mek a. Gaza-a nasa taka chhut an nih hnuah US rawtna angin October atang khan inkahhai an puang mek a, Israel-in Gaza Strip zahve dawn an la thununsak rih mek bawk.
Gaza-a chengte zing atang pawhin indona avanga thi an tam em avangin Hamas hian dem an hlawh a, kum hnih indo chhungin Palestinian 71,000 chuang an thi a, in leh lo ding alawi a awm mang tawh lo bawk a ni.
Hamas-in Israel an beihnaah khan mi 1,200 vel thatin hren turin mi 251 an hruai a, Israel-in sipai chakna hmangin nasa takin a bei let zui ta a ni.
Israel-in an thah Sinwar-a thlaktu tur Hamas-in thlang hnai
