Israel-in Gaza-a puihna thil lut tur a dang
Israeli sorkar chuan Hamas nena inkahhai an puan thawh khatna a zawh rualin Gaza-a puihna bungraw luttir thin an titawp nghal.
Prime Minister Benjamin Netanyahu-a pisa chuan Hamas hian US President Donald Trump-a palai, Steve Witkoff-a rawtna anga inkahhai thawh khatna pawh sei an pawm lo tih a sawi.
Hamas thupuangtu chuan inkahhai chhunzawm dan tur rawtna chu ‘inbumna’ tiin an inkara palai hna thawktute chu Israel hnenah puihna thil luhtir chhunzawm tura ti turin a ti.
Palestinian pawl hian inkahhai chu ruahmanna lo awm tawh sa anga thawh hnihna chhunzawm mai an rawt a, hei hian an mi hren chhuah leh Palestinian lung in tang Israel-in a chhuah leh Gaza atanga Israeli sipai insaseng a keng tel.
Zirtawpni zan khan Hamas chuan thawh khatna pawh sei chu US, Qatari leh Egyptian palai atanga thawh hnihna kalpui zui tur tih an chian hma chuan an pawm dawn lo tih a sawi.
Netanyahu-a pisa chuan, “Mi hren inthleng thawh khatna a tawp a, Hamas-in Israel-in tha a tih Witkoff-a rawt anga inbiak zui a rawtna a pawm lo va, Prime Minister Netanyahu-a thutlukna siam angin tukin atang khan Gaza Strip-a bungrua leh mamawh dang luhtir chu tihtawp a ni,” tiin Pathianni khan a puang.
“Israel chuan mi hrente chhuah zel dawn loh chuan inkahhai hi a duh lo va. Hamas-in an duh lo a nih chuan nghawng a nei thui zel ang,” a ti.
Hamas thupuangtu chuan, “Netanyahu-a thutlukna hian Gaza chunga Israeli rilru puthmang a tilang nawn leh a… Ram dangte pawhin kan mite riltama an awm avangin Israeli sorkar hi an nawr tur a ni,” a ti ve thung.
Inrinni zan khan Netanyahu-a pisa chuan Israel chuan US-in chawlhkar ruk chhung inkahhai pawh sei a rawtna chu a pawm tih a puang a, hei hi Muslim Ramadan leh Judate Kalhlen Kût lai huam a ni.
Hei hi lehlamin an pawm lo a nih chuan Israel hian indo a puang leh mai dawn a ni.
US palai, Witkoff-a hian vantlangah a rawtna hi a puang lem lo va. Israel-in a sawi dan chuan inkahhai pawh sei chhung hian Hamas mi hren la dam leh thi tawh zahve chhuah leh tur a ni.
Netanyahu-a pisa chuan Hamas-in an dinna an thlaka inkahhai pawh sei hi an duh a nih chuan Israel chu indawr zui turin a inpeih reng tih a puang bawk.
Israel leh Hamas inkahhai hi January 19 atang khan thawh khatna tanin Inrinni khan a tawp.
Hei hian thla 15 chhung an indona titawpin hetih chhung hian mi hren Israeli 33 leh Thai panga chhuah an ni a. Israel hian Palestinian lung in tang mi 1,900 chuang a chhuah ve bawk.
Thawh hnihna atan pawh indawr tan a ni a, hetah hian mi hren la chhuah lote chhuah vek leh Gaza atanga Israeli sipaite inthiar chhuah vek pawh tel tura ngaih a ni.
Hamas hian mi hren la dam 24 leh thi tawh 39 an la kawl tura ngaih a ni.
Hamas hian October 7, 2023 khan Israel beiin mi 1,200 chuang a thah bakah mi 251 chu hren turin a la.
Israel hian Gaza Strip a rûn zui nghal a, Hamas enkawl health ministry chuan mi 48,365 an thi tawh niin a sawi.
Israel-in Gaza-a puihna thil lut tur a dang
