Israel army te chuan northern gaza strip-a Hamas command structure chu an tihchhiat vek tawh thu an sawi.
Army thupuangtu Daniel Hagari chuan Palestinain militants te chu ‘commander nei tawh lovin’ an che zeuh zeuh tawh chauh tiin a sawi bawk.
Israel chuan North Gaza-ah militant 8,000 chuang a tihlum tiin a sawi bawk a. Israel Defence Forces (IDF) te chuan tunah chuan south leh central Gaza-a Hamas te nuaichimih chu an thlurbing tawh ang a ti bawk.
Indona chhuah hnuah Israel chuan mi 22,000 chuang a tihlum tawh niin Hamas-run health ministry chuan a sawi a. Kar kalta Inrinni ringawt khan nunna chan mi 120 an awm a ti bawk.
Gaza chu nuaichhiatin a awm nasa hle a, mipui maktaduai 2.3 zinga a tam ber te chuan chenna tur mumal an nei lo mek a ni.
Israel-in Gaza a run chhan hi 7 October, 2023 khan Hamas ralthuam keng tena Israel beia mi 1,200 chuang tihluma mitang 240 vel an hren vang a ni a. Tang inthleng tawnah mi 120 vel erawh an chhuah thung.
Prime Minster Benjamin Netanyahu chuan Israel chuan Hamas nuaichimih campaign chu an chhunzawm zel ang a, mitangte chhanchhuah tum zel bawkin Gaza chu Israel tana hlauhawmah a awm tawh ngai lovang a ti.
“Hnehna famkim kan chan hma chuan thil dang engkim kan hnawl rih ang,” tiin Netanyahu chuan thuchhuah a siamah a tarlang.
Kar kalta Inrinni khan Hezbollah te chuan northern Israel rocket hmangin an kap thung a, chu chu kar kalta tir lama Beirut khawpuia Hamas top-official Israel tena an thah chhan letna tiin an sawi.
Hamas hotu lawk Saleh al-Arouri chu Lebanese capital ah tihhlumin a awm a, Israel-te tih ni ngeia ngaih a ni.
Iran thlawp Hezbollah te chuan Israel kah nan rocket 62 an hman thu sawiin meron a air traffic control base chu a tichhia an ti a. Israel thung chuan Lebanon atangin rocket 40 in a kah thu sawiin an chhang let tiin a sawi bawk.
US Secretary of State Antony Blinken chuan Gaza buaina chuan hlet a neih loh nan leh tharumthawhna a tawp nan hma an lak thu a sawi a.
Blinken hian Greece a tlawh a, chumi hnuah Pathani khan Jordan ah King Abdullah nen inhmuin Qatar a pan leh dawn a ni.
Israel-in Gaza-a ruahmanna kalpui dan tur
