Iran Revolutionary Guards te chuan Syria capital Damascus ah Iranian consulate building Israel in missile hmanga a beih avangin officer pasarihin nunna an chan thu a puang.
Brig-Gen Mohammad Reza Zahedi, elite Quds Force senior commander leh Brig-Gen Mohammed Hadi Haji-Rahimi a deputy ni bawk te chu nunna chan zingah an tel tiin sawi a ni bawk.
Iran leh Syria sorkar chuan demna thu sawi nghalin missile hian Iranian embassy bula building chu a tichhe vek a ni. Israel military thung chuan engmah sawi a la nei lo thung.
Mahse Israel chuan tun hnaiah Syria-a hmun tam tak chu a beih thin tawh thu sawiin chung hmunte chu Iran leh a allied armed group-te, Revolutionary Guards tena ralthuam an pek leh sum hmanga an puih leh training an pekte hmun tiin a sawi.
Nikum October thla a Gaza a indona intan hnu khan Israel chuan Syria ram beih a chhunzawm lo char char a, Gaza buaina lamah a insawrbing deuh vang nia ngaih a ni.
Israel chetlakna thar ber hian boruak tang zawk a siam ngei tura ngaih niin Iran leh a thlawp Hezbollah te chuan chhanletna an siam ngei rin a ni bawk.
Syria defence minstry chuan Israel aircraft-te chuan Iranian consulate building chu an thlurbing tiin a sawi a. Iranian consulate hi Damascus a Mezzeh district a awm a ni.
Syrian air defence chuan missile thenkhatte chu an kapthla tia sawi niin mahse an kahthlak loh te chuan heng building te hi fuhin a chhunga awm zawng zawngte a tihlum vek a ni tiin ministry chuan a tarlang.
Ministry chuan chhanchhuah hna thawh mek a nih thu leh building chimin a delh te lakchhuah tuma beih mek a nih thu sawiin mahse nunna chan leh hliam zat engmah sawi an nei lo thung.
He building chim hi chhawng eng emawzah niin mahse a bul lawka Iranian embassy erawh khawih pawiin a awmin a lang lo thung.
Iranian ambassador Hossein Akbari chuan Israeli F-35 fighter jet chuan ka chenna hmun leh embassy a consular section chu an thlurbing a ni tiin a sawi a.
A hnuah Revolutionary Guards-te chuan thuchuah an siamah an officer pasarihin nunna chan thu sawiin chung zingah chuan senior military adviser Brig-Gen Mohammad Reza Zahedi leh Brig-Gen Mohammad Hadi Haji-Rahimi te pawh an tel thu an sawi chiang zui a ni.
Iranian media te chuan kum 63 a upa Zahedi chu Quds Force senior officer niin Revolutionary Guards overseas operations enkawl tu ber niin kum 2008 leh 2016 khan Lebanon leh Syria ah commander in a awm a, Haji-Rahimi chu Zahedy deputy a ni thung a. Zahedi hi Israel in Iranian mi pawimawh a tihhlum zingah pawh kangsar zual a ni pha a ni.
Iran leh a procy te chuan Syrian capital Damascus a iran consulate beia Iranian general pahnihin nunna an chanphahna chu phuba an lak ngei tur thu an sawi.
Iran state TV chuan Supreme National Security Council chu thukhawm nghalin Israel chu a phutawka chhanlet ngei ni se an ti tiin a sawi a. He meeting hi President Ebrahim Raisi an a kaihruai tiin a sawi bawk.
Aid Convoy kah vangin charity worker pasarih thi
International food charity World Central Kitchen (WCK) te chuan Israel strike avanga an hnathawk mi pasarihin nunna an chan vangin Gaza a operation an neih chu an titawp nghal.
Heng nunna chan charity worker te hi central Gaza a an warehouse an aid convoy in a chhuahsan lai kahfuhin an awm a ni.
Israel Defense Dorces (IDF) te chuan thil thleng chu an enfiah nghal tur thu an sawi a. Gaza a Hamas-run media office chuan Israel demna thu a chhuah nghal thung.
WCK te hi Gaza a tanpuina mamawh ngawih ngawih petu ber pakhat an ni a. An hmalak zel dan tur an ngaihtuah tur thu an sawi nghal bawk.
Charity pawl te chuan Deir al-Balah warehouse aid convoy in a chuahsan laiin kahfuh an ni tiin a sawi a. Charity team te chuan maritime route atanga tanpuina ei tur 100 tons phur chhuak mek an nih thu an tarlang bawk.
Convoy hi pathum niin pahnih chu armoured an ni a, an pathum hian missile in a kap fuh vek tia sawi a ni a. WCK te chuan an convoy kal dan tur chu IDF te an hrilh lawksa thlap tiin an sawi.
IDF te chuan uluk takin vanduaithlak taka thil thleng chu an chhui chian tur thu sawiin, “A bulthut atangin kan chhui ang a, langtlang takin engkim kan pholang ang” tiin IDF thupuangtu Rear Adm Daniel Hagari chuan a sawi a. “WCK hnathawh hi a pawimawh a, humanity frontline a awm an ni” tiin a sawi.
Hagari chuan IDF te chuan World Central Kitchen te chu Gaza a tanpuina pawimawh an pek theihna kawngah an thawhhopui reng a ni tiin a sawi bawk.
Nikum October 7 a Gaza a indona chhuah atangin aid worker 196 in nunna an chan tawh niin US-funded Aid Worker’s Security Database te chuan an sawi a.
Gaza Strip hmun tam zawk chu 7 October a southern Israel Hamas ten runa mi 1,200 vel tihluma mi 253 mitanga an hruai hnua Israel in a run zui hnuah tihchhiatin a awm tawh a ni. Hamas te hian mitang 130 vel an la kawl anga ngaih niin chung zinga 34 vel te chu thi tawh anga ngaih an ni bawk.