Israel-in Lebanon-a Hamas te hmunpui bei

Israel sipaite chuan southern Lebanon leh Gaza Strip-a Palestinian militant group Hamas te hmun chu air strike hmangin a bei.
Israel sipaite chuan kar kalta Ningani a Lebanon atanga northern Israel rocket 34 laia beihna chhanletna tiin an sawi a, hei hi Hamas te tih ngeiah an ngai a ni.
Gaza-a militant te chuan Israel in a beih huah rocket tam zawk an kap chhuak bawk a. Kar kalta tir lam khan Jerusalem-a al-Aqsa mosque chu Israel police ten luhchhuahin an dap thut a, helai hmun hi Islam sakhua zuitu tena an hmun thianghlim bera an ngaih pathumna a nih avangin lungawilohna a thlen nasa hle.
Hamas te chuan Lebanon atangin rocket an kahchhuah thu an sawi lo bawk a, kum 17 chhunga Lebanon atanga Israel rocket hmanga kahna nasa ber a ni thung.
Hamas leader Ismail Haniyeh, Beirut tlawha zin mek chuan Palestinian te chuan Israel in a beihna chu ‘kut kuangkuaha thuin’ an thlir mai mai dawn lo tiin a sawi.
Israel missile te hian Lebanese coastal city Tyre a Rashidieh Palestinian refugee camp chu a kap fuh tia sawi a ni a. Lebanese media te chuan hei bakah hian chhim lam a al-Qulaila khuaah a tla an ti bawk.
Israel Defense Forces (IDF) te thung chuan an indo thlawhnate chuan Lebanon-a Hamas te hmunpui a kap fuh tiin an sawi ve thung a.
“IDF te chuan Hamas terrorist organisation tena Lebanon a inkhuara Lebanon chu chetlak nan bera an hman a remti dawn lo,” tiin an vau lawk zui bawk a.
Hamas te chuan ‘Zionist tena Lebanon an bei chu an dem takzet’ tiin an sawi ve thung.
Gaza ah pawh Hamas te hmun 10 lai chu bitum niin heng zingah hian ralthuam dahna tana leihnuai verh bakah weapon workshop pathum bakah terrorist te leiverh pawh a tel tiin IDF te chuan an sawi bawk.
Israeli media te chuan Gaza lam atangin Israel chhim lamah rocket 44 lai kah chhuah a ni an ti a, heng rocket zinga a tam ber te hi Israel ralthuam chhuanvawr Iron Dome defence system chuan lo dangin a kahhtlak loh te pawhin pawi an khawih lo a, pakhat chuan Sderot a chenna In pakhat a deng thung an ti.
Prime Minister Benjamin Netanyahu chuan Israel chuan kan hmelmate phutawk kan pe let ang tiin a intiam a, Hamas te thiltih a nih ngei thu sawi bawkin hei bakah hian Islamic Jihad te pawh an inhnamhnawih tiin an sawi bawk.
Israel sorkar chuan an ram kahnaah Lebanese militant group Hezbollah te chu an inhanmhnawih thu sawi bawkin hei bakah hian Iranian te pawh inhnamhnawiha an ngaih thu a sawi bawk a. Tun hnaiah Lebanon atangin Israel ram missile leh rocket hmanga kahin a awm zeuh zeuh reng a. Hengte hi Israel chuan Hamas te tih vekah a ngai a, kut thlawn a tuar ngai lo bawk a, a chhang let ngei ngei ziah thin.