Israel-in Lebanon chhim lam a kahnaa mi 11 thi

Israel-in Lebanon chhim lam a kahnaa mi 11 thi
Lebanon-a health ministry chuan thuchhuah siamin Pathianni khan Israel-in thlawhna hmanga an ram chhim lama Kfarhata khua an beihnaah mi pasarih an thi a, an zingah hian naupang kum li mi pawh a tel tih an sawi.
Israel-in Beirut-a Jnah veng an beihnaah mi pali an thi a, mi 39-in hliam an tuar tih ministry chuan a sawi bawk.
Kfarhata khua hi beih a nih hma zan hian Israel sipaite hian a chengte chu chhuah turin hriattirna an pe hmasa a, a tukah kah a ni ta a ni.
Lebanese Kristian, mi cheng hmun thuma thena hmun khat velin Isua Thawhleh Ni an hman mek laiin thla hmasa tir lam atanga Israel nena an ram an indo atanga tharum thawhna nasa ber zinga mi hi an tawng a ni.
Pathianni nileng khan Beirut khawpuiah pawh inbeihna thawm leh a khawpui chunga thlawhna hniam taka thlawk ri chuan a ri a. Khawpui chhim lam dai chu thlawhna atangin vawi riat kah niin sorkar chanchinbuin a tar lang.
He thil thlen hma, Pathianni vek khan Lebanese sipaite chuan an ram chhim lama Israel-te beihpui thlaknaah sipai pakhat a thi tih an sawi bawk.
Inrinni khan Israeli sipaite chuan Syria leh Lebanon inkalpawhna aana hman ber, ramria Masnaa-a chengte chu chhuak tura an tih hnuah an lo beih tawh bawk a. He hmunah hian Lebanese Hezbollah ralthuam keng pawlte an awm niin an sawi a ni.
Lebanon hi Middle East buainaah hruai luh ve mek a ni a, Iran-in a puih thin Hezbollah hian March 2 khan Tehran an thlawp tih lantir nan Israel chu rocket-in an kap tan a, heta tang hian Israeli sipaite pawhin an chhang let ve ta a ni.
Israeli sipaiten Lebanon chhim lamah a bei let nghal a, tunah chuan US-Israel tang dunin Iran laka indo an kalpui mekah chuan indona nasatna ber a ni ta mek zawk a ni.
March thla tawp lam thleng khan Hezbollah fighter 400 chuang an thi tawh niin Reuters chuan a tar lang a. Hemi hun chhung vek hian Lebanon chhim lamah Israeli sipai 10 vel an thi ve tawh niin Israeli sipaite chuan an sawi ve bawk.
Lebanese health ministry chuan Pathianni thleng khan Israel-in Lebanon-a beihpui a thlaknaah mi 1,461 an thi tawh tih a sawi a, darkar 24 vel chhungin thi zat chu mi 39-in pung tihna a ni a. Mi maktaduai khat chuang chu himna zawngin hmun dangah an tlanchhe tawh bawk.
Israel chuan Lebanese ram chhung km 30 (mile 20) vela thui thlenga ‘security zone’ an tih chu thunun a tum thu a lo sawi tawh a. Lebanese ram 15% vel huamin mi chengte hmun himah chhuak tura tihna thupek a tichhuak tawh bawk.
Israel-in chhuak turin ti mah se Lebanese sang tel chu chhim lamah hian an chenna inah an la awm chhunzawm reng tho va, heng zingah hian ramri hrula cheng Lebanese Kristian 9,000 vel pawh an tel a, awm zel an tum tih Reuters hnenah an lo sawi tawh nghe nghe.