Israel Prime Minister Benjamin Netanyahu chuan Gaza indona tihtawp a nih theih nan mitang an hrente chhuahin Israel-in a beihna tihtawp an ngiatna chu a hnawl thu sawiin remtihna a pe a nih chuan Palestinian Islamist group-te chu thuneihna la nei zelin israel tana hlauhawm an ni zui zel dawn tiin a sawi.
Netanyahu chuan mahse Israel chuan Hamas tena mitang mi 138 vel an la hren mek chhuah zalen an nih theih nan indona tihtawp lailawk erawh a duh tiin a sawi thung.
“Israel-in inkahhai a duh a, Hamas te erawhin an thil ngiat tihtlang bur an tum a ni. An tum ber chu Gaza Strip atanga kan sipaite lakchhuah vek a, indona tihtawp a, Hamas te thuneia kalsan a ni” tiin Netanyahu chuan a sawi a. “Chu chu Israel in a pawm thei lo” a ti bawk.
“Hamas te hian thuneihna an chan chhunzawm chuan mihring suat, pawngsual leh rukbo te an kalpui chhunzawm zel dawn,” tiin a sawi.
Cairo-a inkahhai a awm theih nana inbiakna Egyptian leh Qatari palaite nena neihah Hamas leader te chuan an thil ngiat remtih an phut tlat avangin hmasawnna a awm thei lo tia sawi a ni.
Hetih lai hian Israel sipaite chuan Palestinian civilian te chu lakchhuah hna a kalpui tan thung a, hei hi Rafah run ngei a tumzia lantirna anga ngaih a ni.
Rafah-a cheng mi thenkhatte chu a bul hnai Khan Younis leh Al Muwassi a puan inah te a sawn mek nia sawi a ni a. Chutih laiin Israel chuan Palestinian te chu ‘humanitarian area’ tia a sawiah insaseng turin a ti bawk.
Israel sipai tena thuchhuah an siamah palestinian te chu hmun bik a siamah insaseng turin a ti a, Muwasi te ang chu tuipui kam hnaiha awm niin Israel in humanitarian area tia a puan zinga tel a ni a. Israel chuan chung hmuna kal te hnenah chuan tanpuina pe dawnin damdawi in, puan in leh eitur leh tui thianghlim te a pek tur thu a sawi.
Pathianni khan Israel Defense Minister Yoav Gallant chuan Hamas te chuan inremna siama inkahhai an duh tak tak lo tia sawiin Rafah-ah operation turu tak an neih tur thu a sawi bawk a.
Pathianni khan Hamas te chuan tanpuina pekna kawng pawimawh ber Israel main crossing point an beihna avangin Israel sipai pathumin nunna an chan phah bawk.
Indona thlasarih kal tawhah Israel chuan Rafah khawpuiah Palestinian militant group la bang sang chuang te chu an awmkhawm mek tiin a sawi a. Chung mi te chu beih an nih loh chuan Gaza indona an kalpui mekah hnehna an chang dawn lo a ti a ni.
Mahse Rafah khawpuiah hian Palestinian raltlan maktaduai chuang an awm avangin Israel-in a run a nih chuan loh theih lohin civilian nunna chân an tam hle dawn a ni.
Israel-in Rafah run tum tho
