Israel-Iran-US buainain inkalpawhna tibuai nasa

Israel-Iran-US buainain inkalpawhna tibuai nasa
Israel-Iran buaina, US sipaite chet chhuah tel vena leh Tehran-in a chhan letna zawng zawng chuan khawvel puma inkalpawhna a nghawng na hle a, Middle East ram tam takin an chung boruak hawng leh tawh mah se a pangngai a la pha lo nasa.
Pathiannia US-in an nuclear hmunpuite a kah phuba laa Thawhtannia Iran-in Qatar-a US Al Udeid Air Base a kah hnu, Thawhlehni thleng khan airline hrang hrang chuan an thlawhna chhuah leh tum hun tihtlai leh thulhtir an la ngah hle.
Qatar chuan an chung boruak an khar lailawk a, hei vang hian an sorkar enkawl, Qatar Airways chuan an zin chhuah leh luh tur an titawp lailawk.
June 13-a Israel-in Iran a beih thut leh Tehran-in a chhan let hnuah Middle East-a thlawhna tumhmun tam tak an buai phah.
US-in Iran a kah ve hnuah Persian Gulf-a awm, Qatar leh United Arab Emirates-a airline-te chuan zin chhuah leh luh an thulhtir nasa hle.
US President Donald Trump-a’n Thawhtanni zan tlai tawh taka Tehran leh Tel Aviv inkarah inkahhai kalpui a ni dawn tih a puan hnuah pawh airline tam tak chuan chawlhkar laihawl thleng hian himna atan kawng thenkhatah an thlawhna an la thlawhtir rih lo.
Dubai-a Emirates chuan Iran leh Iraq-a an thlawhna lut tur zawng zawng chu June 30 thleng an titawp rih a. An thlawhna dang tam tak pawh indona lai zawna an thlawh lohna turin an kawng an thlaksak a, tam tak an chhuah hun an tikhawtlai bawk.
Kingdom of Bahrain hnuaia Gulf Air pawhin Jordan-a an thlawhtir thin chu Zirtawpni thleng atan an dintir rih dawn.
FlightAware-in a chhinchhiah dan chuan India sanaa Thawhlehni khan zan dar 08:00 thlengin thlawhna zin tur 382 thulhtir an ni a, Thawhtanni khan 834 thulhtir a ni tawh bawk.
Middle East-a thlawhna tumhmun tam tak hi khawvela a lun ber ber an ni a, Iran leh Iraq atanga Mediterranean thleng inzar pharh niin Europe leh Asia inthlawhpawhna ber an ni hlawm.
Hetih lai hian inkahhai kalpui a nih hnuah a ziaawm hret a, Iraq pawhin an van boruak hawng leh tawhin flight-tracking website Flightradar24 chuan thlawhna pawh an thlawk leh tawh tih Thawhlehni tlai khan X-ah a tar lang.
Iranian van boruak erawh Tehran atanga chhuah leh luh nan ram dang thlawhna tan hawn a ni tawh em tih Thawhlehni zan thleng khan hriat a la ni lo.
Israel Airports Authority erawh chuan Tel Aviv bula Ben Gurion Airport-ah erawh dan pangngaia thil kalpui vek a ni tih a puang.
Hetih lai hian Singapore Airlines chuan Pathianni atang khan Dubai-a an thlawhna lut leh chhuak tur chu Nilaini thlengin, ‘Middle East-a ram inelna boruaka himna thlir chungin’ an titawp rih tih a puang.
British Airways pawhin Nilaini thleng khan Doha-a lut leh chhuak tur an dintir rih a, a hnu lama an awm dan tur pawh ‘boruak thlir chungin ruahman a ni ang’ tih an sawi.