Israel leh Palestinian group Hamas te chu nikum October thla tir lam atang khan an indo tawh a.
Hamas ralthuam keng ten Gaza atanga Israel luta an beih vak leh Israel history a nunna chan tam ber tum an thlentir vanga indona chhuak a ni a.
Israel military te chuan chhang let zui nghalin Palestinian territory ah mi sang tamin nunna an chanphah tawh a ni.
Hamas in Israel a bei ha thil thlen dan
7 October zing lamah Hamas ralthuam keng te chuan Gaza ramri kanin Israel an lut a, Hamas te chuan rocket sang chuang an kapchhuak bawk.
Hamas ralthuam keng te chuan he mi ni hian mihring 1,200 an tihlum a, a hnuah hliam tuar 100 chuangin an hliam tuar lovin an thihphah bawk.
Nunna chan zingah naupang te, kum upa te bakah music festival neih mekna Hamas tena an pawngkah avanga nunna chan 364 an awm bawk a.
Hamas te chuan Gaza-ah Israel mitang 250 chuang an chhawm bawk a ni. Chumai bakah Hamas te chuan an chetlaknaah hmeichhia te an pawngsual nasa hle bawk.
Eng nge Hamas, eng vangin nge Israel an beih?
Hamas te chu Gaza ah kum 2007 atang khan an political rival te an hneh hnuah roreltu ber an ni ta a.
Hamas te hian arm wing neiin chutah chuan tun indo hma khan fighter 30,000 vel an nei anga chhutsak an ni.
Hamas tih hi Islamic Resistance Movement tihna niin Israel nawrchhuaka Islamic state din tum an ni a. Hamas te chuan Israel awm hrim hrim chu pawm lo burin nuaichimih chu an tum ber a ni bawk.
Hamas te chuan an chetlak dan chu p[awm thlapin Israel in Palestinian mi te hnena suahsualna a kalpui vang an ti bawk a. An chhuan lam zingah Israel chuan Islam hmun thianghlim pathumna al-Aqsa Mosque, East Jerusalem a awm chu a luhchhuah tih te, West Bank ah Jewish settlement a siam tih te chu a tel.
Heng bakah hian Hamas te chuan Israel a Hamas lungin tang tam tak te chu chhuah zalen phutin Israel leh Egyp[t in Gaza Strip hreka luhchhuahna an dang ping chu tihtawp an ngiat bawk.
Israel nen Hamas te hian indona an kalpui fo tawh a, tun hma pawhin Israel beih nan rocket te a kapchhuak fo thin a. Mahse, tun tuma a chetlakna hi Israeli nunna chan tamna ber ala ni.
Israel pawhin Hamas te chu airstrike hmangin a bei fo bawk a, kum 2008 leh 2014 pawh khan Gaza ah sipai a tirlut tawh bawk a.
Hamas te hi Israel, US, EU leh UK te bakah ram thenkhat tena ‘firfiak’ pawl tia an puan zinga tel a ni a. Hamas te hi Iran thlawp niin sum, ralthuam leh training te a pe thin bawk.
Eng vangin nge Israel in Gaza a beih?
Israel chuan Hamas tena an beih veleh a beizui ge nghal a, Gaza chu vansang lam atangin nasa takin a bei zui nghal a ni.
Prime Minister Benjamin Netanyahu chuan Israel thil tum ber chu Hamas te nuaichimih leh lung in tang te chhanchhuah a nih thu a sawi.
Vansang lam atanga kar thum a beih hnuah Israel chuan lei lam sipai a tirlut tan a, tuipui lam atangin Gaza chu a bei chunzawm reng bawk.
A tirah chuan northern Gaza, a bik takin Gaza city leh a hnuaia leiverh te chu a thlurbing phawt a, chung hmun te chu Israel in Hamas te military operation tihna hmunpui a tih te an ni.
Gaza hmar lama cheng mihring maktaduai 1.1 te chu Israel chuan Gaza chhim lamah an sahim nana insaseng turin a hriattir lawk a ni.
Nikum November thla tawp lamah khan inkahhai puan zui niin chumi hnuah Isrrael Defense Forces (IDF) te chuan southern Gaza lamah operation an neih chhunzawm ta a ni.
Israel sipai te chuan Gaza a khawpui lian ber dawttu Khan Younis chu huala dapin he khawpuiah hian IDF te chuan top-Hamas commander te an biru tiin a sawi a. North lama chenna nei tawh lo te chu chhim lamah an kal zel bawk a. IDF te chuan central Gaza a refugee camp te pawh an dap tho bawk.
Indona avangin Palestinian 26,000 chuangin nunna an chan phah tawh a, mi sang tam takin hliam an tuar tawh bawk niin Gaza a Hamas te enkawl health ministry chuan a sawi a, chung zinga a tam ber te chu hmeichhia leh naupang te an ni a ti bawk.
IDF te chuan Hamas fighter 9,000 chuang an tihlum tawh tia sawiin chung zingah chuan Israel beihnaa inhnamhnawih 1,000 chuang an tel a ti bawk a. Israel chuan a sipai 200 chuang a hloh tawh thu a sawi bawk.
Israel beihna avang hian Gaza a building te chuan an tuar hle a, nasa taka chhia in a then te chu thuamthat ngaihna awm tawh lo te an ni hlawm.
Tu te nge saltang te nia engzah nge chhuah zalen ni tawh?
Hamas tena Israel saltlang an neih 250 zingah a tam ber te chu civilian an ni a. Kum upa te ramtuileilo leh hriselna pan tak te pawh telin a naupang ber chu thla kua leka upa a ni.
Gaza ah Hamas te chuan chung saltlang te chu leiverh hnuaiah leh an fighter te chenna in ah te an dah a ni.
November thlaa inkahhai lai khan saltlang 105 chhuah zalen an ni a, Israel chuan Palestinian saltlang a neih 240 a chhuah ve bawk. Heng hma hian mi pali chu Hamas ten an chhuah zalena IDF ten pakhat an chhanchhuak bawk. Saltlang pathum chu Israel sipai ten tihpalh thilin Hamas te emaw tiin an kphlum bawk.
Gaza civilian leh hospital?
Israel chuan Hamas tena saltang te an chhuah zalen theih nan Gaza a eitur, tui leh fuel pek luh khapin a kar a. Chuvang chuan Gaza a mipui tam ber te chuan harsatna namen lo an tawk a ni.
Mahse, Israel chuan humanitarian aid, medicine leh fuel bituk chin siamin pekluh erawh a remti ta a. Mahse, Gaza a tanpuina lut chu a la beitham lutuk thung.
UN chuan Israel chu tanpuina pekluh tibuaiah a puh a, Israel chuan UN chu harsatna thlentu tiin a puhlet ve thugn. January thla laihawl khan UN chuan Gaza dinhmun chu ‘rapthlak’ tihialin a sawi a, hun reilote hnuah tam nasa tak a tla dawn a ti a, Gaza health system pawh tluchhe mai thei a ti bawk a. Damdawi in 36 awmah 16 chauh a then a zar chauh hawn theihin a awm mek a ti bawk.
Chumai nilovin hliam tuar tam tak enkawlna dawng thei lo an awm bawk a, staff indaihlohna a nasa a, medical supply, food, fuel leh tui thlengin a tlem em em a ni a ti bawk.
Khawiah nge Gaza Strip, eng tiata lian nge?
Gaza Strip hi 41km a sei leh 10km a zau niin Israel, Egypt leh Mediterranean Sea karcheha awm a ni.
Tun hma chuan Egypt thunun thin a ni a, kum 1967 a Six-Day War ah khan Israel chuan chhuhsakin a awp zui ta a ni.
Kum 2005 khan Israel chuan Gaza a sipai a dah 7,000 te chu a hnukkir a, Gaza ah hian mihring maktaduai 2.2 awmin khawvela mihring bitna ber a ni bawk a. Gaza mipui three-quarter vel chu refugee emaw refugee thlah te an ni tiin UN chuan a sawi.
Israel chuan Gaza air space mai bakah a tuipui kam ram te leh ramri te chu thunun tlatin mihring leh bungrua lut leh chhuak a enfiah vek thin.
Eng nge Palestine?
West Bank leh Gaza te hi Palestinian territories tia hriat a ni a. East Jerusalme leh Israel nen kum zabi 20 laihawl thleng khan Roman hun lai atangin Palestine tia hriat lar a ni.
Kum 1948 khan Palestine chu Israel a ni ta a, a kum lehah UN chuan a pawmpui ta bawk. West Bank – East Jerusalem tiamin leh Gaza chu ram tam tak ten Palestine tia an pawm a ni bawk a, mahse, UN member status a nei ve lo thung.
Israel ram pawm lo te chuan West Bank, Jerusalem, Gaza leh Israel te chu Palestine tiin an ngai vek thung a. UN chuan West Bank leh Gaza te chu Israeli-occupied territory ah a ngai thung a. Mahse, heng hmun pahnih te hi Palestinian administration tena an enkawl a ni.
West Bank chu Palestinian Authority (PA) president Mahmoud Abbas kaihhruai chu enkawlin Israel chuan a pumpui thununna a nei thung a. PA hi Israel chuan official in apawm a, Gaza a Hamas te erawhin Israel chu an pawm ve lo thung.
Eng nge two-state solution?
Israel-Palestinian buainaah West Bank leh East Jeruslame hmalam hun chu chinfel harsa ber a ni. Khawvelin remna a awm theih nana ruahmanna a siam chu ‘two-state solution’ tih a ni a.
A awmzia chu West Bank leh Gaza ah independent Palestinian state dingin East Jerusalem chu capital-ah an hmang ang ih a ni a. Palestinian state chu Israel thiangah a awm ve ang tih a ni.
Israel thawhpui leh tantu pawimawh ber US pawhin Gaza indona tawp hunah two-state solution chu buaina tihrehna tur awm chhun tin a sawi a. Two-state solution hi PA te pawhin an pawm a ni.
Mahse, kum 1967 atang khan Israel chuan West Bank leh East Jerusalem ah settlement 140 vel din tawhin chenna in 700,000 chuang a sa tawh a. Heng settlement te hi khawvel ram tam zawk tena dan kalh an tihsak a ni bawk.
PA te chuan heng settlement tin te hi nakina remna leh muanna tluantling a awm theih nan thiah vek tur a ni a ti bawk. Two-state solution hi Israel chuan a la pawm ngai lo hrim hrim a, Prime Minister Netanyhu chuan a duh loh thu a sawi bawk.
Israel chuan tum bera a neih chu Hamas te chu thochhuak leh thei tawh lo tura chhutchhiat law law a ni bur a. Eng hunah mah Gaza chu Israel tana hlauhawma a awm a remti tawh lo, chuvang chuan khawvel ram hrang hrang ten an nawr chungin inkahhai pawh akalpui duh hauh lo va. Mahse, Palestinian mipui te tawrhna nasa zelah inkahhai a awm theih nana hmalakna a awm thung.