Palestinian militant group Hamas-te chuan kar kalta Inrinni khan Israel an bei thut a, silai keng tam tak te chuan Gaza Strip bula community te an bei chiam a, Israeli 900 chuangin nunna an chana sawi niin, sipai leh civilian tam tak, naupang leh hmeichhiate pawh Gaza-ah hrenin an awm mek bawk a.
Isreael airstrike avangin Palestinians 700 chuangte chu tihhluma awm tawhin beih chhunzawmin an la awm mek bawk a.
Heng mai bakah hian Gaza border ah sipai tam zawk chhekin Palestinians te lakah ground operation turu tak a kalpui bawk a.
Kum 100 chuang buaina
World War One khan Palestine leh Middle East awptu Ottoman Empire chu a tlukchhiat hnuah Britain chuan a awp tan a.
Helai ram hi Jewish minority leh Arab majority te chenna hmun a ni.
Jewish leh Arab te chu international community tena Britain chu Palestine a Jewish mite chenna tur ‘national home’ din an remtihsak a.
Jews te tan chuan an ancestral home niin chutihrual chiah chuan palestinian Arabs te cuan an ram tia sawiin an dodal ve ta thung a ni.
Kum 1920 chho leh kum 1940 chho khan Jews te chu tam zawk an luh belh zel a, a tam ber te chu Europe-a tihduhdah tuarte niin World War II holocaust thlen hnua homeland zawngte an ni.
Jews leh Arabs te inkarah leh British rorelna duhlohna pawh a nasa zual zel bawk a.
Kum 1947 khan UN chuan Palestine chu Jewish leh Arab state a thenhran a remti a, Jerusalem chu international city ni turin a hisap zui a.
He ruahmanna hi Jewish leader te siam niin Arab leader te chuan an dodal thung a, a taka kalpuiin a awm ta lo hrim hrim a ni.
Israel ram din leh ‘catastrophe’
Kum 1948 khan harsatnate chinfel a nih theih tak lohah chuan British chuan chhuahsanin Jewish leader-ten State of Israel din a nih thu an puang zui ta a ni.
Palestinian-te chuan duh lova dodalin indona a awm zui ta a. |henawm Arab ramte chuan an rawn pui ta bawk a.
Palestinians tam tak te chu an chenna atanga nawrchhuah niin chu chu Al Naka or the Catastrophe tia hriat lar a ni.
Indona a tawpa inkahhaina siam a nih meuh chuan Israel chuan territory tin deuhthaw thunun tain Jordan ram chuan ram pakhat tuna West Bank tih chu thununin Egypt chuan Gaza a awp zui bawk.
Jerusalem khawpui khawthlang lam chu Israeli forces ten an thunun a, khawchhak lam chu Jordan-in a awp ve thung.
Mahse peace agreement a awm hauh loh avangin indemtawnna thleng rengin a hnu kum zetah pawh inbeihna a thleng zui chamchi ta a ni.
Vawiina map
Kum 1967 khan indona nasa tak thlengin khatah khan Israel chuan East Jerusalem leh West Bank chu a awp ta a, chumai bakah Syrian Golan heights, Gaza leh Egyptian Sinai peninsula pumpui deuthaw a awp ta a ni.
Palestinian refugees leh an thlahte chu Gaza leh West Bank-ah an la cheng zel a, heng bakah hian Jordan, Syria leh Lebanon-ah te an cheng zui bawk a.
Heng an thlahte hi an chen thinna Israel rama an let leh remtih a ni lo va, an let leh a nih chuan Israel chuan mipui lamah tam hnehin Jewish state tana pawi thei a tihmiah thung.
Israel chuan West Bank bik chu a thunun zui zel a, Gaza atang erawhin kum 2005 khan inhnukdawkin UN chuan tun thlengin dan lova ram inawpsakna angah a la ngai thung.
Israel chuan Jerusalem pumpui chu a capital angin a ngai a, chutih laiin Palestinian te chuan East Jerusalem chu Palestinian state future capital-ah an ngai thung. US chu Israel-in Jerusalem a capital anga a puan pawmtu ram tlemte zinga mi a ni.
Tun hnai kum 50 chhungin Israel chuan West Bank leh East Jerusalem-ah settlement a din char char a, tunah chuan Jews 600,000 chuang an cheng tawh a ni.
Heng settlement te hi international law hnuaiah dan kalh anga ngaih a ni a, chu chu UN Security Council leh UK sorkar pawhin a ngaihdan a ni a, mahse, Israel-in engahmah a ngai lo thung.
Eng nge thil thleng mek?
Gaza chu tunah Israel tihchhiat bur intiam ngat leh UK leh ram hrang hrang tena terrorist-a an puan mek Hamas tena an thununa awm mek a ni.
Hamas te chuan kum 2006 khan Palestinian inthlan hnuhung berah chakna changin a kum leh lawkah Gaza pawh thununin an elpui ber Fatah movement of West Bank-base President Mahmoud Abbas chu an nawrchhuak a ni.
Khata tang khan Gaza-a militants te chuan Israel nen indona an nei fo tawh a, Egypt chuan Israel thlawp thungin Hamas-te hrekbeh an nih theih nan a dangchat bawk a ni.
Gaza-a Palestinians te chuan Israel-in a khuahkhirh tlatna leh air strike a neih fote chu an laka hremnna lekkawhna angah an ngai a. Kumin hi West Bank leh East Jerusalem-a Palestinians te tan chuan tawrhna nasa zawk thlen kum a ni bawk a ni.
Eng nge hasratna lian ber ber te chu?
Israel leh Palestinian te hian inrem theih miah lohna an nei nual a. Chung zinga langsar zual te chu : Palestinian refugee te chungchang te, West Bank-a Jewish settelment chungchangah te, Jersualem intawm tur a nih leh nih lohah te bakah a pawimawh ber Israel hrulah Palestinian state siam a nih leh nih loh tur chungchangah te a ni.
Israel-Palestinian peace talks hi kum 1990 chho atang vawi tam tak neih a lo ni tawh thin a, inbiakna pangngai neih hnuhnung ber chu kum 2014 kha a ni.
Hma lam hun?
Eng pawh ni se, awlsam takin remna siamin a awm mai mai dawn lo. Mithiamte chuan harsatna chinfel a nih nana resolution siam a ni lo a nih chuan buaina chu a reh mai mai dawn lo, an ti a.
Peace plan hnuhnung ber Donald Trump-a US president hun laia siam kha Israel Prime Minister Benjamin Netanyahu chuan ‘deal of the century’ tiin a sawi a. Mahse, Palestinians te chuan sir khat chauh ngaihtuah tiin an hnawl hmak ve thung.
Hei vang hian tuna buaina hi engti kawng mahin siamthat leh chinfel mai theih loha ngaihna a lian hle thung a. Khawvel ram hrang hrang te chuan ngaihven takzet mah se, tihngaihna tak an hre chuang lo a ni. US pawhin nasa takin buaina chinfel tumin hma a la tawh chungin Israel leh Palestinian tena an pawm tlan theih tura ruahmanna a awm thei ngai chuang lo a ni. Tuna Hamas te hmalakna pawh hi a phuba lakna a nih thu ualau leh chiang takin an lo puang zui tawh bawk a ni.