Israel thapui thawh thar lehah naupang 322 thi tawh
UN hnuaia naupang lam changtute chuan chawlhkar hnih liam ta atanga Israel-in thapuia Gaza a beih leh hnuah naupang 322 vel an thi tawh tih a sawi.
Unicef hian naupang 609-in hliam an tuar bawk tih a sawi.
“Gaza-a inkahhai a nih lai khan naupangten nun thar neiin tho leh turin beiseina an nei hman a ni,” tiin Unicef Executive Director Catherine Russell chuan a sawi a. “Mahse, tunah hian heng naupangte hi tharum thawhna hlauhawm tak karah an awm leh tawh,” a ti.
Israel hian March 18 atang khan Gaza hi a bei thar leh a, Hamas-in US rawtna anga inkahhai a pawh sei duh loh vang leh mi an hren 59 an la kawl vangah a puh.
Hamas ve thung chuan Israel hian January thlaa inremna an lo neih tawh an bawhchhia niin a puh let.
Unicef chuan Gaza hi ‘insum hauh lova beih’ a ni a, ni 10 chhung, March 10 thleng khan ni tin naupang 100 vel thi ziah ang a nih thu an sawi.
Thi tam zawk hi baihvaia awm leh puan in leh in chhiaa awm an ni hlawm tih an sawi.
Unicef hian Gaza-a Hamas enkawl health ministry chhinchhiah a ring a. Hei hi UN leh ram dangte pawhin innghah nana an hman a ni.
Israel-in ram dang chanchinbumite chu Gaza-a luh an phal tlat loh avangin thil nihna dik tak hriat theih a ni lo.
Thla 18 chuang kal taa indona a chhuah atang khan naupang 15,000 an thi tawh niin Unicef chuan a sawi a, mi 34,000 chuang hliamin maktaduai khat dawn an baihvai mek.
Gaza-ah hian Israel a chet thar leh avang leh March 2 atanga puihna luh a phal loh avangin a awm mekte dinhmun a chau leh zual hle. Kawng a khar hi indona a chhuah hnua a rei ber tum a ni.
Tar lan tawh thin angin Israeli sipaite hian Hamas chhut chimih an tum a. An pawl hi Israel, UK, US leh ram dangin firfiak pawla an chhal a ni a, October 7, 2023 khan Israel beiin mi 1,200 chuang an that a, hren turin mi 251 an hruai a. Hemi phuba hi Israel hian a la mek a ni.
Indona avang hian mi 50,399 an thi tawh niin Hamas enkawl health ministry chuan a sawi.
Israel thapui thawh thar lehah naupang 322 thi tawh
