Lebanon chhim lama Israeli sipai pakhatin lungral hmanga Isua lim a chhu chhe lai nia lang thlalak a darh hnuah sawiselna nasa tak a awm mek.
Israeli prime minister chuan ‘pawi a tiin a rilru a na hle’ tih a sawi a. A foreign minister chuan, “He thil thleng avang hian ngaihdam kan dil a, Kristian zawng zawng, rilru natna tuar apiangte chungah ngaihdam kan dil a ni,” a ti bawk.
Tual chhung mite chuan milim hi Israel leh Hezbollah an indo laia mi chengten an chhuahsan loh khaw tlem te zinga mi, Debel kila chhungkaw chenna in tuala krawsa Isua khen beh lai a ni tih an sawi.
Israel Defence Forces (IDF) chuan ‘sipai thiltih dan hi an sipaite atanga an beisei hlutna nen a inmil lo tak zet’ tih an sawi.
Debel-a kohhran hotu, Father Fadi Flaifel chuan BBC hnenah, “Kraws, kan chhinchhiahna thianghlim leh sakhaw chhinchhiahna zawng zawng tihbawlhhlawh hi kan duh lo vek a. Mihring dikna puan chhuahna kalh a ni,” a ti a. A hma pawhin hetiang hi a thleng tawh niin a sawi.
IDF chuan ‘he thila inhnamhnawihte lakah hian a theih dan angin hmalak a ni ang’ tih sawiin Kristian pawlte nen ‘milim hi a hmuna dah leh turin’ an thawkho tih an sawi.
US hmalaknaa Israel leh Lebanon inkarah inkahhai kalpui tan a nih hnuah pawh Israeli sipai sang tam takin Lebanon chhim lam hmun zau tak an la luah chhunzawm zel a. IDF leh Shia Muslim ralthuam keng pawl, Hezbollah inkara chawlhkar ruk chhung indona chu a tawp tawh rih a; mahse, inkahhai bawhchhiaah an inpuh tawn reng.
Hezbollah hian Israel leh US tang dunin Tehran an beih hnu ni hnihah Iran thlawpna atan Israel hi rocket-in an kap tan.
Israel hian March 2 khan sipai chakna hmanga bei let tanin beihpui an thlakna avang hian Lebanon mi maktaduai khat chuang chu hmun dangah an insawn phah a, mi 2,290 chuangin an thi tawh a, naupang 177 leh damdawia thawk 100 an tel niin Lebanon thuneitute chuan an sawi a. Hemi hun chhung vek hian Hezbollah beihna avangin Israeli sipai 13 leh civil mi pahnih an thi tawh niin Israeli thuneituten an sawi.
Israeli sipaiin Isua lim a tichhiain dem a hlawh
