Lebanon-a health ministry chuan March thla tir lam atanga Israel leh Hezbollah inkara buaina chhuak avanga Israel-te beihpui thlaknaah an ram chhunga thi zat chu mi 3,000 chuang an tling tawh niin a sawi.
Thawhtanni khan thi zat chu mi 3,020 an tling tawh a, inkahhai puan hnuah pawh indona hi a reh tih lanna engmah a awm lo tih lanna a ni.
Lebanon hi March 2 khan indonaah hruai luh an ni a, Iran thlawp ralthuam keng Shia Islamist pawl, Hezbollah chuan Israel leh US tang dunin Iran beia an Supreme Leader an thih hnuah phaba lak nan Israel hi rocket-in an kap tan a ni.
Lebanon leh Israel hian Zirtawpnia ni 45 chhung inkahhai pawh sei an remtih hnuah pawh thihna a thleng chhunzawm zel a, June thla tir lamah inbiakna neih leh an tum bawk.
Health ministry chuan April 17 atanga inkahhai puan a nih atang khan thi 400 chuang an awm tawh tih a sawi a, he hun chhung hi lehlam lehlam hian inkahhai an bawhchhe fo a ni.
US ruahman anga inkahhai puan hian Israel-in Hezbollah-te sipai chakna hmanga beihna a neih theih phah a ni.
Lebanon chuan pawikhawihna thlengte hi a dem thu sawiin an rama ralthuam keng pawlte ralthuam a thunun theihna tura a hmalakna chu a tikhawlhkham niin a sawi.
Zirtawpnia inkahhai pawh sei a nih thu puan a nih atang khan Israel hian Lebanon chhim lam leh Bekaa Valley-a khawpui leh khaw hrang hrang a beih chhunzawm zel a, mi tam tak an thi.
Inrinni khan khaw 20 chuang an bei a, heng zinga pakua chauh hi insawn chhuak tura tihna pek hmasak an ni.
Inrinni tlai lamah hian Hezbollah chuan an fighter-ten Israel hmar lama Yaara barrack chu ‘attack drone tam takin’ an bei tih an sawi ve bawk a. Hei hi Hezbollah-in Lebanon chhim lama Israeli sipaite lakah vawi eng emaw zat beihpui an thlak thu an sawi hnuah a ni.
Israeli sipaite chuan Inrinni khan indonaah sipai pakhat a thi tih an sawi a, March thla tir atanga an hloh zat chu 20 a tling tawh a, civil mi pali an thi tawh bawk.
Israeli sipaite chuan indo laia an lak, Lebanon ramri atanga km 10 vel zeta thuk chu an luah chhunzawm zel a ni.
Israeli-ten Lebanon an beihnaah mi 3,000 thi tling tawh
