Indian Space Research Organisation (ISRO) chuan developmental flight Small Satellite Launch Vehicle – SSLV-D2 chu hlawhtling taka kap chuakin February 10 zing lam khan satellite pathum te chu orbit-ah an awmna tura duanah a dah a ni.
Satellite pathum te hi – ISRO’s Earth Observation Satellite – EOS 07, U.S.-based firm Antaris’ Janus-1 leh Chennai-based space start-up SpaceKidz’s AzaadiSAT-2 te an ni.
SSLV-D2 hi Satish Dhawan Space Centre-SHAR, Sriharikota atangin zing lam dar 9:18 ah kah chhuah niin kum 2023-a satellite kah chhuah hmasak ber a ni.
“SSLV-D2-EOS-07 mission chu hlawhtling taka kah chhuah a ni” tiin ISRO chuan an twitter handle ah vehicle kah chhuah a nih hnu lawkah an tar lang zui nghal a.
ISRO Chairman S. Somanath chuan, “A thawh hnihnaa SSLV-D2 chuan EOS-07 satellite chu orbit a a awmna tura duanah fuh vhatin a dah a ni. Satellite dang pahnih Janus-1 leh AzaadiSAT-2 te pawh orbit-a an awmna tur chatah a dah bawk,” tiin a sawi.
Somnath chuan, “SSLV chuan a hmasa berah SSLV-D1 kapchhuak tawhin orbit-ah a tum tak chu velocity mamawh tawk a neih loh avangin a dah fuh thei lo. Tunah erawh SSLV-D1 in harsatna a neihte siamtha in hlawhtling takin kan dah theia kan lawm a ni” tiin a sawi.
Kum 2018 khan bultanna kalpui ani tiin S.S. Vinod, Mission Director of SSLV chuan a sawi a, “August 2022 khan a tum khat nan kan kap chhuak a, mahse, a awmna tur orbit-ah tak kan dah fuh thei lo. Zirchianna kan nei zui nghal a, tunah chuan harsatnate sukiangin kan tifuh chat thei ta a ni,” tiin a sawi.
“Thla nga hnuah kan tharthawh leh ang a, SSLV thar kan kap chhuak leh ang,” tiin a sawi bawk.
SSLV developmental flight hmasa ber hi Satish Dhawan Space Centre atangin August 7, 2022 khan kah chhuah niin a hlawhchham thung a, rocket chuan satellite payload te tikal thei lovin orbit an thleng zo lo.
ISRO te chuan spacecraft chuan velocity mamawh tlakchham avangin a fuh loh phah tiin an sawi a, hei vang hian thil dang pangngai vek mahse a tum ram a thleng thei lo an ti.
A hnua zirchianna an neihah kah chhuah a niha propulsion performance, state seperation leh satellite injection tinah te second stae (SS2) seperation awm dawnah Equipment Bay (EB) lamah vibration lamah harsatna awm tih finfiah a ni a. Hei hian Inertial Navigation System (INS) khawih buaiin chu chuan Fault Detection and Isolation (FDI) software sensor te chu thil dik lo awm tiin a hrilh phah an ti.
EOS-07 hi 156.3 kg satellite niin, ISRO tena an design leh siam vek a ni a. EOS-07 in a tum ber chu microsatellite bus leh technology thar te payload instrument design leh siamsak niin heng te hi nakin zela satellite te tana pawimawh leh mamawh tur a ni a, hei bakah hian rang takin technology payload thar hmang microsatellite te siamna kawngah a pui dawn a ni.