Daily Newspaper

Isua cho vanga ngaiawh thei tawh lo McGregor

20

Mi thiam ber, mi lar ber leh hausa ber pawh nise an chunga roreltu chu Pathian a ni. Mitin chunga roreltu, Pathian hming meuh lam a, mahni theihna chhuangtutte tihtlawmin an awm a. Chapona tlangsang atangin beng hniam an ni thin. ‘Isua ka hneh ang’ tih a sawi hnua ngaiawh tak tak thei tawh lo UFC fighter lar Conor McGregor chungchang inkhel.com in ngaihnawm taka an ziah hi i chhiar ve ngei atan kan awt a, kan rawn chhawpchhuak e.

UFC Fighter piang tawh zawng zawng zinga boruak nei lian ber leh a ruala weight division hnih ngawta champion thei hmasa ber Conor Mcgregor a thusawi lar tak leh a chakloh apianga an hmer tel ziah thin chu, “Isua ka hneh ang,” tih thu mawlh mai hi a ni.

Kum 2015 khan a hunlaia UFC Interim Featherweight Champion nilai Conor Mcgregor chuan a vanglai a hman chhoh mek laiin TMZ Reporter pakhatin, “Isua nen Octagon chhungah intum ta ula, tu zawk nge chak ang che u, ” tiin a zawt ta nawlh maia, TMZ reporter lar meuhin a zawh takah chuan UFC Superstar Mcgregor a nui deuh suka, nui deuh chunga chhang zuiin, ” Mihring damlai zingah min hneh thei an awmlo. Isua chu a thi tawha, thihna atangin lo tho leh pawh nise, ka hneh tho ang, “tiin a chhang liam ve maia, Internet khawvelah Isua meuh pawhin min hneh lovang, a mawngah ka pet ang tih thlengin social media-ah dawt thu leng vak a awm ta zui.

TMZ Reporter vek hian Mcgregor a hmuh remchan leh zawhna ho deuh deuh zawt lehin Mcgregor chuan, ” Isua nena min chotuah vel kha i la hria em, i mawl hle mai. Khatiang zawhna atthlak kha min zawt tawh suh, “a ti hial. Hemi awmzia chu a lo tawng sual palh tih hre chungin inthiamlohna lian tak a neia, covid 19 a rawn hluar tak chhoh te khan Italy ram tan te pawh a tawngtai reng thin. Krista a rin zia tichiangtu pakhat a tih theih ang.

Mi thenkhat inchhiar zau vaklo chuan Isua a sawichhiat atang khan a chak leh tawh ngailo te an ti, thuchiang hre lova mahni ngaihdan atthlak kalpui hi an awm leh nawk thin. TMZ Reporter-in a kawm hnua thutak lo taka Isua chungchang a sawi hnu hian a hunlaia featherweight champion ropui ber Jose Aldo chu second 13 lekah KO hmanga hnehin featherweight kawnghren a chhuhsak, hemi hnu lawk hian a hunlaia lightweight champion Rafael Dos Anjos nena insual tura ruahman vek anih tawh hnuin Dos Anjos inhliam avangin a aiah Nate Diaz a hmachhawn thut a ngai a, a weight khelhna thin lightweight huangah ni lovin Welterweight anih bawk avangin a inbuatsaih tha hman lova, second round-ah Diaz hian a rek tlawm. A chakloh rual hian Krista dodaltu chu tihmualpho a ni, Isua meuh ka hneh ang titu chu tihtlawm a ni tih thu velin Zoram pawh a tuam vel.

Mcgregor hian Nate Diaz a hnehloh hnu hian welterweight-ah tho intum nawn lehin inbuatsaihna a nei mumal chho ta deuha, majority decision-in hnehna a chang, a hnu lawkah UFC 205 -ah a hunlaia lightweight champion Eddie Alvarez hneh lehin UFC bika a ruala category hnih ngawta champion thei hmasa ber a ni ta. Rei vakloh hnuah MMA a chawlhsan zuai, a title kawllai pawh a dahawl a ngai ta hial. A chakloh lai chauhin Isua a sawichhia tiin social media lamah nasa tawka vawrh lar a ni thin, a chakloh chhanah a tawngkam thu chhuakin sawi zui a hlawh em em rualin a chakna erawh sawi zui a hlawh lemlo thung. Hemi awmzia chu Mizote hian Kristianna hi kan rindan atthlak takin kan hmehbel kual vel tih a entir chiang viau.

Mayweather nena boxing match-ah an inhnek hnuin round 10 naah TKO-in a chak lova, hetah pawh Isua sawi chhetu chu hnehin a awm tih hawi zawnga thu puar pawleng vel a tam leh hman viau. Khawvela boxer piang tawha tha ber zinga ngaih kha engvangin nge UFC Superstar, contact sports huanga thiam bik tak nei vakloh khan a hneh ngawt ang tih hi mi pangai ngaihtuahna atang chuan boxing ring chhunga a hneh ngawt thu awm lo. Mcgregor hian Mayweather a tum hnu hian US Dollar 100 million lai hlawh chhuakin Whiskey Proper Twelve chu a buaipui chho, nasa taka a hausak hnu hian a lar tirha chak duh tak tak a neihna thin a hloh ti ila, kan sawi sual tam lovang.

UFC 229 khan a fit lai ber pawh nise, a hnehlo tura ngaih tharum hlang leh savawm meuh pawh lo inbuan pui tawh thin lightweight champion Khabib Nurmagomedov a hmachhawn ta mauh mai. Round tir atangin a bet zawka tangin round 4 naah Khabib hian a rek tlawm. Heta a chakloh pawhin Isua a sawichhiat vanga chaklo tiin zoram khawvelah chuan whatsapp leh facebook lamah a darh leh ta chuai. Mcgregor hian wrestler leh jiu Jitsu thiam tak lakah a career hmasa lamah pawh a talbuai viau thin tih hi hai rual a ni lo, UFC a luh hma pawhin a tumpuite lakah vawi hnih tlawm tawhin, a chakloh pahnih te pawh a tumpuiten submission hmangin an hneh ve ve.

UFC 246-ah a hneh tur chiangsa anga ngaih Cerrone chu first round-ah a tukdawl. Hemi tum erawhin Isua a sawichhia tia rak thin an reh leh hmak thung si. First round knockout hmanga hnehna a chang leh takah chuan UFC 257-ah rematch nghahhlelhawm takah kum 2014 lama a lo knockout tawh Dustin Poirier hmachhawn turin inremna neih chhoh a ni leh. Kum 2014 khan a vanglai a hman mek bakah inbuatsaihna a neih nasat thin lai ber a ni a tih theih anga, hetih lai hian featherweight-a khel thin Poirier hian a taksa rihna aia hniam takah weigh in-ah a taksa rihna a paih vaka, kg 86 vel kha kg 65 ah a intizang thin. A tuk lawka a rihna ngaia awm leh thuak tur chuan a taksa in a tlin ngang lova, Mcgregor a kutthlak hi a tuar zo ta lo te pawh a tih theih awm e. Featherweight chung chiah lightweight huanga a khelh chho hnua a kutthlak nat sawt zia en te hian a tichiang viau mai. Mcgregor chungchang bawkah let leh ila, Krista sawichhetu an tih fo Mcgregor hian a hmelma hlun Khabib chunga a rilru puthmang te hi a kristian zia asin. Khabib, a pa in a boral san hnua a tawrhpui zia te a la thawn zela, mihring nunnem tak anih na a lantir a tih theih.

UFC 257 leh 264-ah Dustin Poirier laka TKO hmanga a tlawm chungchangah pawh Isua sawichhetu tih a ri leh ta hluai. Mcgregor hian a hausak hmaa chak duhna tak tak a neih thin ang kha a hloh tawh ti ila, kan sawi sual tam lovang. Zan khat thil thuah boxing ring chhungah US Dollar 100 million hlawh ta thut ila, mi tam tak tan phei chuan Octagon chhunga thi hnuanga insual leh a peihawm tawh vak lovang. A thu hrimin Poirier a hnehloh chungchangah pawh Mcgregor hian sumdawnna buaipui tur a ngah ta lutuk avangte pawhin a hmaa “The Notorious” ang kha a pha leh thei tawh lo viau, hemi piah lamah UFC te chu khawvel game thrang chak ber anih angin an khelhdan style an in man zung zung a, Mcgregor pawh a kut veilam hi a hlauhawm em em, a hnek chhuak tur hian southpaw stance-ah dingin a ke ding lam chakna hmang tangkaiin a kut veilam a thlawh chhuak ta thin. Poirier-a coach Mike Brown pawhin nasa taka Mcgregor an zir hnuin an man chho ta viau, an intum hnuhnung pahnih ah pawh Mcgregor-a ke dinglam hi a pet sak fo anih kha. Chutah Conor hi a fitness a that vakloh avangin a rei telh telh chuan a chau hma em em, a vanglai ngei pawhin a cardio thalo tih a ni thin. Chutah inbuan lama tawnhriat lo nei tawh Poirier-an tih hah dan ngaihtuahin man behin tumin remchang a zawng nen.. Mcgregor hi a career tirah pawh inpawmchilh thiam a tum thiamlo kan tih tawh kha. Krista sawichhetu vang ngar ngar tia puh lovin, a vanglai a pel tawh tih hi pawm thiam mai a tha.

Tun hnaia a ke ruh tliak chungchang pawh Isua sawichhetu tih bawk a ri leha, amah Mcgregor ngei pawhin Poirier nena an intum hmain a ruh a khi sa tih hi UFC leh Dana White te pawhin an hriatpui thu a sawi vek bawk. Zoram khawvela a chakloh apianga Krista dodaltu kan tih leh a chak tuma kan hmuh hmaih leh thin hian social media lama kan post thinna ah ngaihdan atthlak kan siam thin tih a tichiang hle a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy