Rev Dr Ramengliana
Ani chu a lo tho a, thli chu a hau va, dil hnenah pawh chuan, “Ngawi la, awm hle hle rawh,” a ti a. Thli chu a bang a, a lo reh ta thuap mai a. Ani chuan an hnenah, “Engah nge in hlauh? Rinna reng in la nei na nge?” a ti a. An hlau ta em em a, “He mi hi tu nge ni le? Thli leh dil lam pawhin a thu an awih hi?” an ti a. Marka 4:39-41
Kan Bible chang tarlanah hian Isua hauh tawktu pahnih kan hmu a. Hmangaihna leh dawhtheihnaa khat, nunnem leh zaidam Lal Isua thiltih Bible ziaktuten ‘hau’ tia han sawi meuh khawpa thil thleng chu a mai mai lo hle ni tur a ni. Lal Isua hian awm a tih loh zawng tak a tawng ni ngei tur a ni. Keimahni anga thinrim eng phiara mi hau ta rum rum ang chi hi a ni hauh lo tih a hriat a, a thil tawn leh thil nih dan tur a inrem loh em avanga kam khat leh zilhhau deuh te pawh a ni zawk ang.
A hauh hmasak zawk chu nasa taka rawn thaw thli kha a ni a. A zirtirte a tibuai nasa a nih kha. Kha thil thleng kha engkim chunga a thuneihzia lantirna tura hmanraw remchang tak a lo ni ta bawk. Pathian hian a mite tibuaitu hi a hre chiang hle thin a, a thuneihna huang chhungah chauh tihbuaiin kan awm thin tih kan vawn a tha bawk. Eng anga fawn nasa pawh ni se a phal chinah chauh a che thei a ni. A hunah chuan, “Ngawi la, lo awm hle hle tawh rawh,” a ti mai dawn a ni.
A zirtirte ngei pawh kha a kam khat tlat mai. An bula amah a awm reng si a, an mangang phi chung mai kha awm lo a ti aniang e. A thusawi pawh hi, “Ka thiltihtheihna kawng tam takin in hmu reng tawh sia, eng vangin nge in phili vak chu le? Mi ring lo vem ni?” a tihna a ni ngei ang. Ni e. Ringtu, Pathiana innghat, damchhung khawsak thil tawn avanga manganga buai chung thinte hi hauh tlak kan ni e. Kan Lalpa thatna leh thiltihtheihna nen a inhmeh lo em mai!
Reh thupna
Ani chu a tho va, thli chu a hau va, dil hnenah pawh chuan, “Ngawi la, awm hle hle rawh,” a ti a. Thli chu a bang a, a lo reh ta thup mai a. Marka 4:39
Social media a lar hnu hian kan mit ngei a kan hmuh ngai loh leh tawn ngai loh thil tam tak hmuh theih maiin a awm ta a. Khuarel vanduaina rapthlak tak tak te pawh lemche thlalaknaa lo la pawl an awm hman ta thin a ni. Tsunami rapthlak tak, lei min, in chim, tui lian, thlipui tleh, leh a dangte pawh an ni ang. Thlipui na tak tak nat theihzia chu a la tawng ngai lo pawhin hmuh mai theihin a awm ta fo.
Thlipui a lo tleh huna thil chiang tak chu bihrukna hmun tur a vang hle a, hmun him a awm mai mai lo tih hi a ni. Engkim mai hi a hneh vek mai si a! |awngka mai maia ngawia awm hle hle tura hrilh theih a ni lo tih chu kan hre tlang a. Pi leh pute chuan hetiang hunah hian ‘Zahngai, zahngai’ an ti sep sep thin a ni awm e. Khawmual thlipui tuar chu thukhat ni se tuipui chunga a sawi mek lawnga chuangte dinhmunah phei chuan a a let tam takin a hlauhawm zual ngei ang.
Mahse, kan dinhmun a harsat poh leh Isua a che pui thung, sut tur a len poh leh a thiltihtheihna a lang nasa tthin. Chu thutak chu amah ringtu lo awm zel turte innghahna atan hetah hian a lantir a. Ama zirtir ngei, thilmak tam tak a tih hmu tawhte pawhin mak an ti hial a nih kha. Thli leh ruah te meuh pawh a hau reh duak mai si! A remruatna chhungah eng dinhmunah pawh ding rih la, a hre reng che a, engkimin a thu an awih thin tih vawng tlat ang che. Kan Lalpa hi innghahna tlak a ni tak zet e.
Rin tlemna
Tin, lawngah a chuang a, a zirtirte chu an zui a. Dil chu nasa takin a lo fawn ta a; tichuan, tuifawnin lawng chu a rawn vur hlup hlup mai a, ani erawh chu a muhil a. An va kaitho va, “Lalpa, min chhanhim rawh, kan boral dawn hi le,” an ti a. Ani chuan an hnenah, “Rin tlemte u, engah nge in hlauh?” a ti a. Matthaia 8:23-26
Mi pangngai tan leh nunphung pangngaiah chuan zirtirte manganna hi thil awm tak a ni a. Tuifawnin mahni chuanna lawng a vawrh hlup hlup tawh pawha hlauh nachang la hre miah lo chu mi ngaihtuahawm tak an ni zawk ang. Hlauh tur hlau a, hlauh loh tur hlauh loh hi finna a ni. Galili dil kama khawsa thin zirtirte hian thli leh ruah, tuifawn tih angreng hlauhawm theihzia chu an hre chiang ngei ang.
Mahse, an bula awm atanga teh chuan an hlau an phi chung mai hi a rin tlem thlak mah mah thung! Matthaia 8 hian phar tihdam thu te, sipai za hotu chhiahhlawh ral atanga tihdam thu te, mi tam tak tihdam thu te a sawi zo chauh a, he thu hi a sawi kha a nia. Isua thiltihtheihna kha an hmu nasa em em a, mahse an la hlau tho. Isuan a nihna a hmuhtir tawh a, engkim chunga a thuneihzia mit ngeia hmutu an ni a. Lawng pakhata chuang ho na na na chu thlamuanga ngawi hmak awm chu an ni maw le.
Kan chak lohna hi a lo lang chhuak thin a. Kan rinna a lo tla hniam thin. Mihring ze bulpui chu hlauh hi a ni nghe nghe awm asin. Kan manganna hrang hrangte hi kan engkim hretu leh engkim ti thei tan chuan ho te te an ni fo ang. “Eng vangin nge mi rin zawh mai loh aw?!” a ti vawng vawng thinin a rin theih. Chuvangin, thian duh tak, tun hma zawng pawh khan min awmpui tawh thin tih kan hria a, tunah pawh min la awmpui zel dawn. Tun hma zawng khan a thatna kan dawng thin a, a aia nasain kan dawng zel ang tih i hre reng ang aw.
ISUA HAUH TAWKTUTE
