Football ram ropui tia hriat ni chunga a zawna tum thum ngawt World Cup khel phak lo zawn tawh Italy in hmasawn an tum a, coach tur an zawng mek. Italy hian coach langsar Pep Guardiola leh Carlo Ancelotti te dawr ve ve mah se an hlawhtling zo rih lo.
Italian Football Federation (FIGC) technical director Paolo Maldini chuan Brazil national team enkawl mektu Italian coach Carlos Ancelotti an dawr thu a sawi a. Ancelotti hian an ram team kaihruai theihna hun tha nei bawk mah se Brazil enkawl chhunzawm a thlang zawk rih a, FIGC sawmna a hnar.
Ancelotti an hmin theih loh hnuin coach langsar tak Pep Guardiola an dawr zui leh nghal a, Guardiola pawhin a lo hnar ve leh tho bawk. Tunlaia manager tha ber ang hiala ngaih Guardiola hian Manchester City a chhuahsan a, team enkawl nei lovin a awm mek. Italian national team enkawl theihna hun tha nei bawk mah se chawlh hahdam rih a thlang a, FIGC sawmna a hnar.
Ancelotti leh Pep Guardiola te an sawm hlawhtlin zawh tak loh vangin Italy play ropui zinga mi Andrea Pirlo chu Italy coach thar a nih a rinawm ta hle. Ball thiam leh fing Pirlo hian Dubai club United FC a enkawl mek a, FIGC nen an indawr thuai tura ngaih a ni a, an ram team enkawl chu atan chawimawina a nih a rinawm.
Italy hi Nations League-ah France, Belgium leh Turkey te nen group khatah an awm a, group champion nih tumin tan an khawh dawn. Pirlo hian a enkawl a nih chuan Euro 2028 khelh phak tumin tan an khawh zui nghal ang.
Italy in coach an zawng
