Zirtawp zana UEFA Nations League inkhel ngaihven hlawh takah Italy in France an lehthal a, Belgium in awlsam takin hnehna an chang ve bawk.
Italy hi France hmachhawn turin Parc des Princes, Paris-ah an lenglut a, an len luhna mualah goal an chhuah hma hle. Inkhel tan atanga minute khatna lekah Bradley Barcola chuan France hmahruaina goal a thun nghal. Hma takah goal an thun vangin France hian rinlawk aia awlsam in hnehna an chan theih a beiseiawm hman. Euro 2024 a beisei phak lo Italy hian huaisen takin an khingpuite an beisei a, 3-1 in hnehna an chang let ta daih thung.
Italy tan hian Federico Dimarco chuan minute 30-naah goal thunin an si phurh a sut a, Davide Frattesi-an minute 50-naah hma an hruai letna goal a thun hnuin Giacomo Raspadori chuan minute 74-naah an goal thumna thunin an chakna a nemnghet. Hma takah goal an chhuah vanga tlawm tura ngaih ni hman Italy hian team lian France an hneh let a, point thum hlu bik an hmu.
Italy in France an hneh tum hian Arsenal defender thar Ricardo Calafiori chuan hliam a tuar a, hliam vangin eng chen nge a chawlh ngai dawn a la chiang lo thung.
League A lama inkhel dangah Belgium chuan kai thar Israel an hmachhawn a, 3-1 in hnehna an chang. Belgium tan hian Kevin de Bruyne chuan goal hnih a thun a, Youri Tielemans chuan goal khat a thun ve bawk. League A, Group 2-ah Italy in hma an hruai nghal a, France in table mawngphah an luah rih. Group 2-ah hian team lian France, Belgium leh Italy te an awm tlang a, he group hian ngaihven a hlawh hle.
Italy in France an lehthal
