Italy record goalscorer leh Cagliari forward hlui ni bawk Luigi ‘Gigi’ Riva chu kum 79 mi niin mual a liam.
1970 World Cup semi-final pakhat zawka 4-3-a West Germany an hneh tuma goal khungtu pakhat Riva hi heart attack avangin Sardina bial khawpuia an damdawi in pakhatah kartawp khan enkawl niin, a damchhuak zo ta lo a ni.
Hminglema ‘Roar of Thunder’ an tih mai Riva hian Azzurri tana mach 42 a khelhah goal 35 thun tlingin, 1968 European Championship-a Italy a champion-pui bakah kum hnih hnuah World Cup final a thlenpui a; club lamah kum 1970 khan Cagliari chu tun thlenga an Serie A title awmchhun ni ta a lakpui bawk.
Riva hian tum hnih ngawt hliam naran lo tak a tawrh avangin Italy tan a khel tam thei ta lo a; a hliam pakhat zawk chu kum 1970-a Cagliari-in a zawna league title pahnihna an beisei laia thleng niin, a keruh a tihtliah avangin Cagliari title beiseina pawhin a tawrh phah ta nghe nghe a ni.
Kum 1963-a Cagliari a zawm hnu khan a club career pumpui tih theih tur chu Cagliari-ah a hmangral a; Serie A goal khung hnember vawithum a nih hnu kum 1976-a football a chawlhsan thleng khan Islanders tan goal 207 a thun tling a, 1969 Ballon d’Or thlannaah runner-up a ni.
An player hlui thlahna thuziak chu X kaltlangin Cagliari-in an tarchhuak a; Italian Football Federation (FIGC) president Gab-riele Gravina pawhin Italian soccer-in an na-tional hero an sun mek tih a sawi ve bawk.
FIGC hian an legend sunna atan kartawpa Italy rama football match zawng zawngah inkhel tan hmain minute khat sunna hun hmang turin hriattirna a chhuah.
Thawhtannia Saudi Arabia khawpui Riyadh lam daiha Italian Super Cup final an khelh tum pawh khan Napoli leh Inter Milan match second half-ah Riva sunna hun hman niin, minute khat chhung ngawi renga dinna hun buatsaih a ni.
Italy tana goal khung hnem ber Riva hun tawp
