Tun tuma Kuki-Zo leh Meitei inkara buaina a chhuah hnua Manipur tribal-te intelkhawmna pawl Indigenous Tribal Leaders’ Forum (ITLF) chuan Mizoram mipuiin an thlawp tlatnaah lawmthu an sawi.
Indigenous Tribal Leaders’ Forum (ITLF) thuchhuak chuan, Mizoram mipuiin Manipur-a an unaute thlawpna lantira state puma kawngzawh an neihnaah, NGO Coordination Committee, Mizoram mipui leh chief minister Pu Zoramthanga kaihhruai sawrkar chungah an lawm tih a sawi.
Thla thum kalta chhung khan Manipur-a Kuki-Zo tribal hnam chu nuaibo tumin state sawrkar thuneitute puihna in Meiteiin an bei tih sawiin, Manipur sawrkarin tribal-te a enkawl danah leh hmeichhiate chunga rawva taka chetna a lantir thin chuan ram hmel a tibal hle tih a sawi a. Manipur tribal-ten anmahni leh an ram luah humhalh tura beihpui an thlak theih chhan chu Mizoram tanpuina vang chauh a ni tih a sawi.
Buaina chhuah tirh atanga Mizoram sawrkar, NGO leh kohhran hrang hrang, state chhunga mipui zawng zawngin theihtawp chhuaha an chhawmdawlna, an tawngtaipuina, kawng tam taka an puihna chuan unau kan nihna a hma aia sang zawka a tihngheh thu ITLF hian sawiin, Mizorama an thlavang hauhna kawngzawh chuan Manipur-a an unaute an hmangaihna leh thlawp that zia a lantir tih a sawi a ni.
ITLF-in Mizoram mipui chungah lawmthu an sawi
