Jack Harlow hla hit “Lovin on Me” chu Billboard Hot 100 (singles) chart-ah No.9 atangin No.1 a kai thar leh ta a, tihian a zawn ni kher lovin he chart-ah hian kar hnih a No.1 ve ta. He hla hi nikum December kar hmasa ber chart-ah khan a vawi khat nan a lo No.1 tawh a ni. Hetihrual hian Doja Cat ‘Agora Hills’ pawh top 10-ah a rawn invawrh kai ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni a, “Lovin on Me” hian kar khat chhungin stream maktaduai 29 leh sales 8,000 kaiin, radio airplay-ah pawh ngaithla maktaduai 52.3 a nei thei a, hei hi chart-ah a No.1 pui leh ta a ni.
‘Lovin on Me’ hi Jack Harlow hla he chart-a No.1 kai thei pathumna niin, April-May 2022 khan a hla ‘First Class’ chu No.1 puii, October 2021-ah Lil Nas X nena an thawh dunna ‘Industry Baby’ an lo No.1 pui tawh bawk.
Taylor Swift hla hit, chart No.1-ah pawh kar li lo awm tawh ‘Cruel Summer’ chu No.19 atangin No.2-ah a invawrh thar leh a, chart No.7 pawh lo ni tawh Tate McRae ‘Greedy’ chu No.24 atangin No.3-ah a invawrh thar leh a, chart No.1 hlui Doja Cat ‘Paint the Town Red’ pawh No.29 atangin No.4-ah a invawrh thar a, chart No.1 hlui Zach Bryan ‘I Remember Everything’ featuring Kacey Musgraves chu No.31 atangin No.5-ah a invawrh thar ve leh ta bawk.
Krismas boruak kalsanin, kum a lo thar ta bawk a, chart ranking-ah pawh Krismas hla a lang ta lo a, chutihrualin hla tlangzarh thar a la awm vak lo bawk a, hla lar tawh sa te chart ranking-ah an invawrh thar leh ta a ni.
Chart No.2 lo kai zak zak tawh SZA ‘Snooze’ chu No.6-ah bawk a la awm a, No.10 lo kai ve tawh Tyla ‘Water’ chu No.32 atangin No.7-ah a invawrh a, he chart-a kar 16 No.1 ni thei Morgan Wallen ‘Last Night’ chu No.36 atangin No.8-ah a invawrh thar leh a, chart No.2 lo kai tawh Luke Comb ‘Fast Car’ chu No.47 atangin No.9-ah a invawrh thar ve leh ta bawk.
Chart top 10-a a la lang ngai lo, lang thar awm chhun chu Doja Cat hla ‘Agora Hills’ a ni a, stream maktaduai 11.7 leh sales 1,000 bakah radio airplay-ah maktaduai 39 tlingin, No.35 atangin No.10-ah a invawrh. He hla hi Doja Cat hla he chart top 10-a lang thei pakuana a ni.
Jack Harlow ‘Lovin on Me’ a Hot tharleh
