Jade khur chimin mi tam tak chhilh

Northern Myanmar a jade mine leimin in a hnawl avangin a tlem berah mi 30 an chin hriatlohin an awm mek a.
Kachin state a Hpakant tlang chu khawvela jade mine lian ber awmna niin tharchhuah pawh a tam berna a ni bawk.
An chin hriatloha awm mek te hi tualchhung mi te heng lai hmuna jade zawnga nitin hnathawka wm thin te leh mining pits rauhsan tawha inkulh te nia sawi a ni a.
Helai bial velah hian May leh October thla inkar monsoon ruahsur nasat laiin leimin a thleng fo thin a ni.
July 2020 khan helai hmunah tho hian leimin avangin mi 162 in nunna an chanphah tawh bawk a, kum 2015 pawh khan mi 100 in nunna an chanphah tawh bawk.
Heng lai hmunah hian furpui lai chuan mining tihphalloh a ni a, mahse, tuna an chin hriatloha awm mek te hi chu a hranpaa anmahni thu a jade zawnga teichhuak thin te an ni.
Ruahsur nasa tak chuan lei nasa taka tihminin heng lei laih hi 150m laia sang te niin chungha chuan leitawlh nasa tak tak a thleng thin a ni.
Heng lai hmun hi jade zawn nasatna leh awmze nei taka ruahman a nih loh avangin chim mai thei dinhmuna ding teuh a ni bawk a. Jade zawng hian mi tam tak an pungkhawm thin a, heng jade te hi China ah hralh a ni ber thin bawk.
Jade mining hi Myanmar sipai sorkar tana sum lakluhna pawimawh ber pakhat a ni a, chutihrual chiah chuan ethnic armed group Kachin Independence Army te sum hnar a ni bawk.
Kum tam tak chhung chu Myanmar sipai leh kachin hel pawl te chuan Kachin State a jade mine an inchuh tawh a, heng jade mine te atang hian kum khatah 30 billion dollar vel tharchhuah thin nia ngaiha ni bawk.