District Jail Kolasiba tang damlo leh boral an awm palha hmalak dan tur leh jail tangte hriselna uluk zawka enkawl a nih theihna’na mawhphurtute chu Zirtawpni khan bawrhsap John LT Sanga hoin an thukhawm a. Kolasib SP Vanlalfaka Ralte, chief judicial magistrate Cacy Malsawmtluangi, district medical superintendent Dr Samuel L Fanai leh member dangte an tel.
Thutkhawmnaah hian jail tang turte chu jail-a dahluh an nih hma ngeiin an hriselna uluk taka endik a tul thu leh jail an awm chhung pawha endikna uluk taka kalpui a pawimawh tih a sawi a. National Human Rights Commission-in kalphung a duante zawm a pawimawh thu leh heng kalphung hi thawktute pawhin an hriatchian a tul thu sawi a ni.
District Jail superintendent report danin, District Jail Kolasib-ah hian tunah tang 73 awmin an zinga 67 chu mipa an ni a, hmeichhia 6 an awm an ni. Jail tang zingah kut inthlakna emaw thawktute atangin intihduhdahna a awm awm hriat a nih loh thu sawi a ni a, hriselna pan deuh leh dam lo awmte chu jail chhunga inenkawlna bakah District Hospital-ah a tul anga enkawl thin an ni. Jail tanglai boral, ‘Custodial Death Case’ a awmin NHRC-in a phut anga hmalak dan tur sawi hoin, sawt zawka hna kalpui a nih theih nan district pawna thawn ngai chi test hrang hrang result chak zawka hmuh a tul thu sawi a ni.
Jail tang ngaihtuahtute thukhawm
