Mizoram puma kalpui tur Integrated STI, HIV, TB and Hepatitis (ISHTH) Campaign chu Thawhlehni khan Mamitah chuan District Jail-ah neih a ni.
Campaign hawngtu Mamit chief medical officer Dr Zothankhuma Chhakchhuak chuan inpawlna atanga natna kai theih STI (sexually transmitted infections) avangin natna 30 chuang inkaichhawn theih a awm a, chuvangin inpawlna hman kawngah fimkhur a tul hle, tiin, damdawi ruihtheih hmanga inchiu thinten syringe an inhman tawm thin avangin natna hlauhawm tak tak kai theih a ni bawk a, theihtawp takmeuha fimkhur a tul, tiin a sawi.
Jail tangte-ah hian HIV, TB leh Hepatitis vei an awm thin avangin an tan damdawi in an chhawp hnaihsak tih medical lam hotute chuan sawiin, damdawi leh a enkawlna senso zawng zawng a thlawn a ni tih an sawi.
Mamit Health department-a thawktute bakah District Aids Prevention Control Unit Aizawl atangin an telpui a. District Jail Mamitah hian tang mipa 60 leh hmeichhia 3 an awm mek. Health checkup neih sak nghal an ni a. Mamit khawpui chhung leh khaw chhehvela Home hrang hrangah ISHTH Health Checkup hi neih chhunzawm a ni ang.
Jail tangte hri kai leh kai loh enfiah
