Jail tangte tan rilru hriselna sawipui
District Jail Visitor Board Lunglei chuan Thawhlehni khan District Jail Lunglei an tlawh a. Hemi rual hian Lunglei Disrict Legal Services Authority (DLSA) huaihawtin jail tangte tan rilru hriselna chungchang (mental health) leh India rama dan thar (criminal laws) pathum zirhona buatsaih a ni.
He hun hi Lunglei South bialtu MLA Lalramliana leh district bawrhsap R Lalthazuala ten an hmanpui a. Lunglei District Jail superintendent mawhphurhna la mektu, sub-deputy commissioner Lalrampari report pek danin, District Jail Lunglei hi 1977 September 19-a luah tan a ni a; venhimna lam hna hi Mizoram Home Guard-in an thawk a, jail chhung security erawh jail warder-ten an thawk. He jail hi mipa 99 leh hmeichhia 10 awm theihna tura ruahman a ni chungin, a aia tam an awm deuh reng a. Tunah mipa 114 leh hmeichhia 19, an vaiin tang 133 an awm. Thawktu indaih lohna leh mamawh an neih a sawi bawk.
Jail Visitor Board-in an tlawh puala inkhawmah hian jail tangten harsatna an neih an sawina hun leh an thil hriat duh an zawhna hun hawn niin, DLSA atangin chhan leh hrilhfiah an ni. Mithiamten mental health chungchang leh criminal law thar pathum chungchang an sawi a. Zawhna awmte chhan a ni bawk.
Jail tangte tan rilru hriselna sawipui
