Daily Newspaper

Jaishankar leh Wang Yi inbiakna ngaihven hlawh

23

ExternalAffairs Minister S. Jaishankar chuan Thawhlehni zan khan Moscow thlawk lutin ram 8 awmna Shanghai Cooperation Organisation meeting neihnaah a tel dawn a. Hetah hian kumin October thlaa SCO summit a chhawp chhuahtur an ngaihtuah dawna ngaih a ni.

Chung zawng aimah chuan Jaishankar leh Chinese foreign minister Wang Yi tena meeting karlaka inhmuhna an neitur chuan ngaihven a hlawh zawk a. Line of Actual Control-ah boruak a tãng a, kum 45 hnuah silai hmehpuahna hmasa ber a thleng zui bawk.

Tun hi thla li kaltaa ramria boruak sosang nasa tak awm atanga ram pahnih foreign minister te hmaichhana an inhmuhna hmasa ber tur a ni.

“Council of Foreign Ministers (CFM) meeting Moscow-ah neih a ni ang a, SCO summit awmtur atana inpuahchahna niin international leh regional issue te pawh sawiho a ni ang,” tiin Ministry of External Affairs (MEA) chuan thuchhuah siamin a tarlang a, “External Affairs Minister in Moscow a tlawhnaah hian Council of SCO Foregn Ministers a tel bakah bilateral meeting dang te pawh a tel ang,” tiin a tarlang bawk.

Officials te chuan India-China meeting hun an sawi duh lo chungin Jaishankar chuan kar kalta khan ‘hun rei tak a hriat tawh’ Wang chu a hmuh ngei tur thu a lo sawi tawh a. Thawhtanni khan Jaishankar chuan LAC a thil thleng chu ‘pawi thei tak’ tia sawiin ‘ram pahnih ten political level-ah inbiakna khunkhan tak neih a ngai’ a ti bawk.

Foreign minister tena inhmuhna an neih hma karkhat kalta khan Defence Minister Rajnath Singh leh China defence minister General Wei Fenghe te chuan Moscow ah bawk LAC chungchangah inbiakna an nei a, mahse, engmah inremna an siam thei tawh lo.

Jaishankar an diplomatic lama chona nasa tak a neih hi thil hrang hrang avangin a nasa zual hle a, chung zingah chuan LAC a thil thleng hi la awm ngai lo niin kum 1962-a India-China war thlen hma boruak nena inang tak nia sawi a ni bawk.

“China hian boiler plate approach kalpuiin tun thlengin kum 1959 a inlaichinna tlakchhiat lai ang khan ‘dik leh dik lo’ chungchang chauh a sawi a. Mahse, EAM in thil awmdan a chiang lo a ti chungin political level a inpawhna chu kalpui zel ngai a ni. Thil awm dan hi a tha lem lo” tiin foreign secretary hlui leh Ambassador to China pawh ni tawh Nirupama Menon Rao chuan a sawi a. “Ram pahnih tena an tan hmun an sawi behchhan chuan meeting pawh nei se beisei tur vak awmin ka hre lo,” tiin a sawi bawk.

Thawhtanni khan silai hmehpuah niin India chuan Chinese PLA te chu silai hmetpuak hmasatu zawkah a puh a, kum 1975 a Arunachal Pradesh LAC a silai hmehpuah hnua hmehpuah leh hmasak ber niin kum 1962 indona awm hnua Ladakh-a silai hmehpuah hmasak ber a ni bawk. Hei bakah hian June thlaa Galwan a sipai tena nunna an chan kha kum 1975 hnua sipai nunna chan hmasa ber a ni bawk.

Jaishankar-Wang tena Moscow a meeting an neih hian boruak tha a siam thei dawn em tih hriat a ni lo va. Officials te chuan Prime Minister Narendra Modi leh Chinese President Xi Jinping te inrawlh a ngai dawn em tih zawhna an chhang duh rih lo bawk. Ram pahnih hruaitute hi kum 2017 Doklam crisis thlen khan tum hnih an inhmu a ni.

India Prime Minister Narendra Modi leh Chinese President Xi Jinping te hi tum 18 an inhmu tawh a, mahse, tuna buainaah hi chuan engmah sawi an la nei lo ve ve thung. November thlaah Saudi Arabia a G-20 summity neihnaah inhmu tura ngaih an ni a, chu chu an inhmuh leh hmasak ber tura ngaih a ni thung. SOC Summit boruak azirin chumi hma a ni thei tho bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy