Nilai zing khan NBA season tournament khelh chhunzawm a ni a, LA Lakers in point 131-99 zeta Utah Jazz an sawp tumin player ropui LeBron James chuan record thar siam in, NBA-ah point 39,000 thawkchhuak thei hmasa ber a ni. Nilai zinga inkhel dangah Indiana Pacers chuan Atlanta Hawks hnehin quarter-final an lut.
Los Angeles Lakers in Utah Jazz an hmachhawn tum hian player ropui LeBron James hian record thar siam turin point nga a mamawh laiin point 17 ngawt a siam. Jazz laka point 17 zet a siam hmang hian NBA-ah point thawkchhuak hnem ber ni thin Kareem Abdul-Jabbar-a point khawl sa 38,387 zet chu a khum a, NBA player zingah point 39,000 thawkchhuak thei hmasa ber leh awmchhun a ni. Record thar a siam tum hian Crypto.com Arena-a mipui pungkhawmte chuan NBA Most Valuable Player ah vawi li ngawt thlan ni tawh LeBron James hi zahna chibai an buk.
LeBron James ropui zanah LA Lakers hi an khingpui Utah Jazz lakah an khel tha viau a, quarter pali-ah chungnung zawk an ni vek. An khingpuite hi point 34 zetin an hneh a, quarter-final an lut zui nghal bawk.
Nilai zinga inkhel dangah Indiana Pacers chuan an khingpui Atlanta Hawks chu point 157-152 in an hneh a, quarter-final an lut ve bawk. Harsa taka Hawks an hneh tum hian Pacers player pawimawh Tyrese Haliburton chuan point 37 zet a thawkchhuak. Chawlhlawk thlenga point 20 zeta an hnufualna chu Pacers hian pui zetin an chhang let a, hnehna chhinchhiahthlak an chang. Inkhel dangah Cleveland Cavaliers chuan overtime-ah point 122-119 in Philadelphia 76ers an hneh hram a, quarter-final luh theih beiseina an nei zui zel.
NBA Season tournament quarter-final hi December ni 4 leh 5 ah khelh a ni ang a. December ni 7-ah semi-final khelh niin December ni 9 khian Las Vegas-ah final khelh a ni ang.
James-a’n record thar a siam
