Mizoramah January-ah ruah a sur thin a, kuminah pawh a sur, mahse a tlem ngang mai. Amaherawhchu, ruah hi January thlaa a sur loh kum pawh a awm a, kuminah tlem mah se January-ah ruah chu a sur ve hrim hrim e.
Science & technology deptt enkawl State Meteorological Centre-a an chhinchhiah danin, kumin January thla khan ruah hi mm 1.8 a tla.
Ruah mm 1.8 hi a tlem a, teh tham a tling ve ngawr ngawr tiin a sawi theih. A tlem a ni mai lo a, vawi khat chiah a sur, January ni 25 khan.
Nikum khan January-ah ruah a sur lo a, nikum khan ruah hi a sur har khawp mai, ruah hmasa ber kha March ni 16-ah a sur chauh. Kuminah chuan thla hmasa berah a sur nghal.
2022-ah khan January-ah a tla tha a, mm 23.8 a tla. Fur lai ni lo thlasik laia tlaah chuan mm 23.8 hi a tlem lo. 2020-ah phei chuan mm 48.1 a tling.
State Meteorological Centre chhinchhiahnaa a lan danin, tun hnai kum 10 chhungin 2014, 2017, 2019 leh 2023-ahte khan January-ah ruah a sur lo.
Tunlaiin khua a vawt a, mahse State Meteorological Centre-in an tehnaah temperature hi hniam vawng vawng lai a la awm lo. kuminah a hniam ber laiin 10°C a la ni a, 10°C aia hnuaiah a la awm lo. Amaherawhchu, temperature hi a san ber laiin a sang vak ngai lo thung a, ni khata a lum ber laiin 20°C hnuai lam a ni deuh zel. A lum ber laiin a kawk sang ngai lo a, hei vang hian khua a vawt tih chu State Meteorological Centre enkawltute sawi dan a ni.
January-ah ruah tla tlem
